影相Apps節日搞氣氛

臨近聖誕，唔少地方都有大型布置同燈飾畀大家影靚相，傳統相機影出嚟嘅質素固然係靚，但點都唔及iPhone Apps可以即時執相加工放上網同朋友Share咁方便。今次就介紹幾個過癮Apps畀大家齊齊喺聖誕搞吓氣氛啦！

01 剪貼拼相 《PhotoShake！》

《PhotoShake!》最多可以一次過處理12張相片，只要大家揀選好之後再搖動機身，就會出現唔同嘅相片排列效果；加埋可以輸入文字同埋自訂顏色，靈活性夠高，創作度亦大。啱心水嘅仲可以立即掟上社交網站同朋友分享添！

下載費用：$1.99美元（折合約港幣$15.5）

02 自製貼紙相 《PriPri Marron》

呢款《PriPri Marron》嘅下載費用雖然貴咗啲，但係就每個功能都有4至5種主題，每個主題又有十幾種以上圖案可以揀選，加埋文字塗鴉，大家影完靚相後，不妨同朋友一齊發揮創意，繪畫出有趣又獨特嘅貼紙相，為聖誕時光留下美好回憶！

下載費用：$2.99美元（折合約港幣$23.3）

03 驚喜合成 《QuistCam》

由本港女攝影師Quist開發嘅《QuistCam》就包含咗E沖C呢種相片沖印元素，再加埋隨機嘅雙重曝光效果，每次影相後合成嘅影像都唔同，無論影燈飾定自拍都會畀大家唔同嘅即時驚喜。

下載費用：$0.99美元（折合約港幣$7.7）

04 白滑美肌《Silky Skin Camera》

美肌模式有幾好？男仔可能唔多覺，不過對於天生愛美嘅女仔嚟講，就簡直係恩物啦！好似呢個叫《Silky Skin Camera》 嘅App就備有呢種「扮靚」功能，仲分別有光暗度同白淨度可以揀，想整到零毛孔都無問題啦！

下載費用：免費

05 Lomo友最愛《MoreLomo》

唔少時下年輕人都鍾意玩Lomo機，貪佢有Feel又分分鐘有驚喜，但係每次影相都要買菲林同要畀沖印費，真係小數怕長計。想做到差唔多效果，又唔想特別花錢嘅話，《MoreLomo》就可以幫到你。用法相當簡單，只係影相介面多咗啲白黑邊同塵埃，影出嚟嘅聖誕相分外有中古味道！

下載費用：免費

06 自製貼紙相《Photoframe X'mas》

好多女仔都鍾意影貼紙相，貪佢圖案得意，過程又好玩，依家安裝個《Photoframe X'mas》一樣做得到。佢提供嘅相框仲相當應節，有齊雪人、聖誕帽同聖誕鐘等靚靚圖案，加埋可以手寫文字塗鴉，喺聖誕開P時同朋友仔影合照就最啱用。

下載費用：免費