馬沙專用機 紅遍模界

有元祖高達，又點少得紅彗星！作為高達模型（GUNPLA）30周年嘅大禮，全新系列Real Grade（RG）嘅RX-78-2 Gundam已經喺7月推出，宿敵MS-06S Zaku II亦於早前接棒。雖然估到Bandai九成九會一雞多味，量產型MS-06F/J、高機動型MS-06R等數之不盡嘅渣古型號，大有機會排隊上，不過掛住馬沙專用機嘅招牌，高達迷都係唔買唔安樂，先玩為快啦！

以1/144嘅比例（約13cm高），做到1/60 PG嘅精密度，就係RG人人讚嘅原因。今次嘅RG紅彗星就沿用同系嘅高達內建骨架，十足袖珍版PG，不過紅彗星毋須喺心口搵位放Core Fighter，組裝更快手快腳。至於RG高達嘅手腳連動設計，紅彗星自然做到足，當中以大腿裝甲嘅移位幅度最明顯，一屈膝就Show到內建骨架，為呢款科幻模型增添「像真」效果。

素組加滲線 靚晒

RG高達造型跟足今年喺東靜岡展出嘅1/1大高達，機身上嘅白、藍、紅等色，各種都有深淺之分。雖然Bandai仲未整1/1紅彗星，不過RG版本都參考咗1/1高達嘅特色，細心啲睇，就會發現深紅及粉紅部分，都各有至少兩種深淺Pattern，配合廠方冠絕模型界嘅多色成形功力，基本上，「素組」加滲線已經有唔錯效果，再想減低外觀上嘅「膠感」，噴多層消光就掂晒。

渣古兄弟兵 出硬

渣古型號眾多，不過最大分別都係背囊及小腿推動器，砌過呢部RG紅彗星，就令人高度相信廠方會將其他渣古RG化，事關呢兩個位置（例如E23及E28組件）都可以輕易換件，又唔會影響整體結構，渣古粉絲睇怕要長追落去。不過喺其他渣古接棒之前，希望廠方改善一啲小問題先，包括上臂後面嘅裝甲，同高達一樣好易甩，尤其是屈臂玩連動時就更易中招，而且腰側嘅裙甲活動能力亦未算高。隨盒武器更只係基本級數，淨係有120mm機關槍、280mm火箭炮及熱能斧，至於渣古常用嘅MMP-80機關槍、三連裝飛彈及手榴彈，睇怕會喺下款RG渣古補番啩？

查詢：2433 1828（瑞華行）

同步登場

紅彗星有後

被視為紅彗星後繼機種嘅新安洲（Sinanju），同期出咗Robot魂版本，武器多多之餘，最吸引係唔使組裝、上色嘅完成品，一開盒就玩得，高達迷毋須為機身上嘅幼細金邊點上色而苦惱了。

熊霸少女心

高達都有女粉絲？Of Course！喺《GUNPLA Builders G》故事中，就將原本薯頭薯腦嘅水陸機種Agguy，改裝成熊仔樣嘅Beargguy，個樣咁卡娃兒，聽聞喺日本就吸納咗好多女生粉絲，唔知喺香港又Hit唔Hit得起呢？