California　再辣啲碳Up

做人要識歎，做車都係，尤其是超級跑車，更加要識「碳」！好似法拉利嘅California，係廠方首款裝咗電動硬摺頂及雙離合器波箱嘅新進型號，加埋453bhp嘅澎湃馬力，早已成為拉利迷嘅Dream Car。點知廠方都仲未滿意，最近加推升級版本，所有改動都緣於一個「碳」字！

環保人士唔好投訴住，California所加嘅碳，並唔係廢排多咗二氧化碳，而係車身內外嘅碳纖物料咋！呢種既堅韌、又有輕量化效果嘅物料，由落場車到量產嘅Super Car都視為恩物，而且原裝California都有用，不過廠方似乎嫌唔夠喉，所以整多個升級版本，實行內外碳到盡。

18秒硬頂即開

講番California嘅本身設計，靈感源自1957年嘅California Spyder，雖然定位為雙門四座位硬摺頂開篷跑車，不過坦白講，California嘅後排都幾窄，放行李就得，車主都係當雙人車用好啲。前排就當然絕對無問題，寬敞之餘，兩張高桶椅又夠承托力，而且淺色皮櫳同火紅色車身大玩撞色效果。至於最有Gimmick嘅地方，梗係廠方首次採用嘅電動硬摺頂，變身過程18秒搞掂，而且喺硬頂狀態下，個Look型過唔少軟篷車。

廠徽都唔放過

至於升級版本嘅最大改動，就係車身同車廂加咗好多原廠碳纖Parts，辣跑形象變本加厲，當中包括油缸蓋、頭唇擾流，門柄、門壁、中控台面板，就連廠徽都唔放過，跑車迷見之一定興奮，而且廠方將合金輪圈都換埋輕量化啞黑色新Look，賣相更Tough，亦與全車嘅碳纖Parts配合，齊齊為減輕車重出力。代理仲表示，車主可按個人喜好，要求更多嘅修改，炮製出獨一無二、唯你獨有嘅版本。

大馬力唔大食

做得超跑，唔只要型，仲要有實力！California就有4.2公升V8引擎撐場，呢副偈用齊缸內直噴技術（Direct Fuel Injection）及可變進排正時系統（Varible Timing），配合七前速雙離合器波箱，令馬力及扭力分別去到460ps及49.4kgm嘅驚人水平外，仲可以提升燃油效率，廠方公布嘅綜合耗油數值只有13.1L/100km，即係$2/km左右，碳纖上身之餘，亦比以往嘅超跑放少咗二氧化碳。

查詢：2808 0978（勵駿汽車）