摩記三防DEFY 插水冇O嘴

on.cc 東方互動主頁

手機發展一日千里，機身保護性卻十年如一日，跌落水即死，失敗！所以當Motorola還原基本步，重推三防機DEFY，着實令小記有不少驚喜。咁點三防法先？防水、防沙兼防刮，無論滾滾沙塵，還是雨水照頭淋都依然冇事；加上行Android 2.1，由內到外都咁踏實！

若果閣下係「後80」，未玩過都一定見過三防手機，當年Nokia、Motorola同Siemens係咁出，但不知甚麼原因卻突然淡出市場，搞到只餘下日系機仲會玩防水。今次Motorola將三防與智能手機二合為一，難保不會再帶起新熱潮。

水深一呎正常運作

提起三防機，即時想起大大舊磚頭。不過DEFY卻打破這慣例，外形跟一般平板智能機沒有分別，厚度亦僅得13.4mm，輕薄得來卻具備防水功能，原來內裏設計大有乾坤。首先是機身接合位共用了7顆螺絲鑲緊，其次是接駁介面都有防水膠邊保護，加上電池蓋有安全鎖；三者結合下就能達到世界最高的IP67防水級別，即可在水深1呎下正常運作。小記測試時將佢「插水」半粒鐘，之後抹一抹乾機身便能繼續使用，真係堅！另外，DEFY屏幕還使用了跟iPhone 4相同的Gorilla Glass高強度耐磨玻璃，配合防沙功能，就算去地盤開工都冇有怕。

公版介面小改仲正

規格方面，咪以為三防機就會好求其，DEFY完全相反，不但行緊Android 2.1智能系統，還用上了3.7吋854×480觸屏、採用800MHz處理器，並內置512MB RAM及2GB快閃記憶體，論規格跟其他頂級Smartphone沒有兩樣。至於介面，一如過往MOTOBlur被抽起，改為用公版介面，但廠商就細心地作出不少微調，例如7版首頁設有頁數索引，掂一掂就識得轉頁，毋須手指狂撥咁麻煩；另外首頁的Moto Widgets小工具相片、日曆等，除了可改動位置外，就連大細都可更改，操作更人性化。

極罕追加 Lomo特效

雖然Motorola表示明年第一或第二季才會為DEFY升呢上Android 2.2，但現有功能其實已相差無幾。例如3G Hotspot程式，可將手機變成Router，再將頻寬分享予其他裝置；另外雖然佢冇Flash 10.1，但依然可透過Flash Lite播片睇廣告，加上瀏覽器可讀取完整HTML，上網基本上同電腦冇分別。此外，Android機影相一向麻麻，但DEFY就內置了500萬像素鏡頭，支援閃光燈、自動對焦之餘，取景時還可加入大量Lomo效果，例如懷舊、變紅、轉藍、黑白及負片等，比公版介面更具玩味。