濕地公園　睇完雀Natural High

on.cc 東方互動主頁

每年呢個時候都有大量候鳥喺遷徙途中，飛到香港作短暫棲息，所以香港濕地公園由現時到明年2月期間都會舉行「觀鳥節2010」，好似「香港之寶」黑臉琵鷺、水鳥同鷸都會趁冬天嚟香港歇一歇腳，趁星期六、日去行個轉，Hea住觀鳥兼呼吸一下清新嘅空氣，成個人都即時醒神晒！

點解會喺呢個時候搞「觀鳥節」？皆因香港米埔后海灣拉姆薩爾濕地，即係濕地公園所處位置，係東亞至澳大利亞遷徙水鳥飛行路線中，一個重要嘅中途站，因此亦成為本地觀鳥的好時機。

租望遠鏡睇黑臉琵鷺

唔少候鳥都會在這段時間從北方飛到香港歇一歇，然後再去溫暖地方搵食物，數量仲有成230種咁多，當中更包括16種全球受威脅的鳥類，如名氣最大嘅黑臉琵鷺等等，小記採訪當日走入濕地公園行咗一個圈，已經見到黑臉琵鷺同水鴨等唔同品種嘅候鳥。濕地公園入面更有唔少位Set定晒望遠鏡畀大家遠距離欣賞候鳥，好似在訪客中心二樓、河畔觀鳥屋、魚塘觀鳥屋、泥灘觀鳥屋等，如果想行到邊睇到邊嘅話，仲可以自備或租用望遠鏡慢慢睇！

專人帶路免費導賞

觀鳥雖然都係幾靜態嘅活動，因為主要都係郁吓支望遠鏡，遠眺吓棲息於唔同位置嘅雀鳥，輕輕鬆鬆夠晒寫意，最啱平日做到唔停手嘅都市人！另外，各位亦可就啱時間參加由香港濕地公園舉辦的導覽團活動，由專人帶隊幫大家搵出雀鳥的蹤影，以及講解分辨雀鳥的技巧，總好過自己盲摸摸亂估一通，好玩得來又有教育意義，非常適合帶埋小朋友一齊享受家庭樂，不過平日去的話，最好預早在出發前一個小時報名啦！

偶遇鵰兄頭上飛過

「觀鳥節」期間更會舉行蒐集靚相活動，畀機會大家上載靚相跟其他人分享，所以小記特別找來生態攝影達人Samson So（蘇毅雄），傳授大家一些拍攝雀鳥的技巧。佢話影雀兩大秘訣就係「靜」同「等」：拍攝時要耐心等候雀鳥靠近，保持動作要輕，切忌大聲喧嘩，或將鏡頭伸出觀鳥屋，咁就有機會拍到靚靚雀鳥相。Samson又特別強調器材方面唔一定要很高級，但要意識到長焦距鏡頭都有自己的限制，唔需要盲目追求特寫，有時多拍一啲環境亦可豐富構圖。呢段時間常見的鳥類有黑臉琵鷺、海鷗或鸕鶿等水鳥、以及野鴨或鷸，亦有機會見到鵰，不過通常佢哋會在頭上飛過，用鏡頭捕捉有一定難度，影唔影到好睇彩數。