維特港 馬拉叮叮過大海
澳洲之旅幾乎每天都有動物做伴，划艇搵海豚、袋鼠陪打Golf，再直接點可以去動物園摸勻各種有袋動物。動物全接觸玩法仍未滿足？那就去阿得萊德的維特港（Victor Harbour），坐一轉馬拉車（Horse Drawn Tram）。身繫噹噹的明星馬拉動雙層木頭車橫越海邊棧橋，恍如馬車及叮叮電車的Crossover，滿載海濱閒情與懷舊風情。
距離阿得萊德1小時車程的Victor Harbor，氣溫及人口密度都比阿市低，故吸引不少當地人趁周末到此偷閒。我山長水遠來到南澳，目的當然不只Hae，坐馬拉車吹海風才是目的。
懷舊馬拉車
初聞馬拉車，以為是馬來西亞的旅遊點子，哈！看似度身訂造的觀光交通工具，其實是南澳的集體回憶與標誌。時光倒流1894年，當地居民以馬拉車橫越Victor Harbor對出的Granite Island，女的穿着大傘裙撐着傘，男的一身踢死兔擠在馬拉車上兜風，殖民地色彩滿瀉。後來因汽車的出現，加上經營成本上漲，馬拉車被迫於1954年停駛。幸好仍有人戀舊，於1986年出錢拯救馬拉車，好讓成班醒目馬仔又有工開，我哋又可一嘗馬拉車河！
相信部分愛心爆棚的讀者，未坐車已先為馬匹擔心，普通馬車只載數個人，而馬拉車的車卡可載40人，只靠一隻馬拉行，似乎有點不人道。一向視動物如朋友的澳洲人，當然會為馬匹設想，其實恍如電車的車卡設有車輪及路軌，馬匹步行便可拖行車卡，每星期只需工作9小時，工作量比想像中輕鬆。這種如穿了四隻小毛靴的Clydesdale馬仔好受歡迎，既有生日Party玩，又有紀念卡推出，比快活谷的馬匹應該快活得多。
25分鐘旅程
今次為我們拉車的馬大哥叫Bill，Bill哥甫出場已受遊人夾道歡迎，真係好似明星咁威。然後女車夫為Bill哥戴上類似眼罩的物體，目的不是防UV，而是令Bill哥完全不察覺正拖行坐滿40人的電車，會更定性。
為看無敵海景，不少一家大細已雄踞頂層，舉定相機自拍合家歡；跑慢幾步坐樓下的，雖然海景唔夠360度，但可以近距離欣賞Bill哥英姿，4隻小毛靴隨風搖曳確係幾威風。若嫌悶，可以學我對面兩隻頑皮小鬼，將天花扶手當單鋼，成程玩引體上升，唔經唔覺已25分鐘，Bill哥載我們去到Granite Island了，辛苦晒！
Victor Harbor Tramway
地 址：City of Victor Harbor, PO box 11, Victor Harbor SA 5211
馬拉車：成人AU$5（約HK$39）
小童AU$3（約HK$23）
網 址：www.horsedrawntram.com.au
親親小羊駝
坐完馬拉車，又要趕去探另一種動物：羊駝。這班小可愛棲息於The Olive Grove and Lloyd Brothers Wines莊園，當地McLaren Vale地區擁有宜人的地中海氣候，莊園既是酒莊、橄欖園及羊駝飼養園地，換句話說，梗有一款產品啱你心水。源出南美的羊駝，平時較少機會接觸，縱然園內有美酒與橄欖誘惑，還是對那數隻羊駝BB愛不釋手，又摸又攬。
羊駝跟羊咩一樣怕醜，樣子卻比羊咩Cute得多，微翹嘴角像對你笑，引得我和團友圍着牠們團團轉。想將羊駝輕而暖的羊毛時刻披上身，可在園內店舖揀條羊駝毛圍巾，除了羊毛圍巾，還有售橄欖、橄欖油及紅白佳釀。
The Olive Grove and Lloyd Brothers Wines
地址：34 Warners Rd, McLaren Vale, SA5171
網址：www.lloydbrothers.com.au
旅遊資訊
簽證：持BNO可透過旅行社或航空公司辦理簽證，特區護照可辦理電子簽證，費用AU$20。網址：www.eta.immi.gov.au
機票：香港飛阿得萊德來回經濟客位機票約HK$9,390
天氣：12月份氣溫約17℃-21℃
貨幣：AU$1約兌HK$7.7
時差：快香港2.5小時
馬拉車的車卡與香港的「叮叮」相似，難怪分外有親切感。
靚女們看見各種味道的橄欖，食完一粒又一粒。
Granite島布滿奇形怪狀的花崗岩石，是隱藏不少神仙企鵝的巢穴。
坐在頂層可飽覽無敵海景，記得上車第一時間霸頭位。
車廂非常定，定到頑皮仔可以玩引體上升。
樣子可愛的羊駝，被網民視為「神獸」的真身，令牠們聲名大噪。
企鵝出沒注意！不過神仙企鵝在黃昏才出沒。
與神仙企鵝緣慳一面，惟有搵銅像合照。