砌圖冧女 Samsung 幻彩NORi

on.cc 東方互動主頁

早前大埔軒哥為博紅顏一笑，在學校大派iPhone 4而成為城中熱話。佢冧唔冧到女，小記就唔知，但與其派「唉瘋」咁俗氣，不如派最新Samsung手機NORi咪仲見心思。點解？首先4色漸變機身已夠煞食，加埋機面設有可愛LED燈，可以砌出多款心情圖案來傳情達意，用嚟做聖誕禮物，女神收到實甜到漏！

除水貨手機外，近期已鮮見專為女士而設的手機面世，難得Samsung在力谷Smartphone後也沒有忽視到這個市場。NORi韓版叫NORi F，由於有幻彩閃燈，加上找來人氣組合2PM拍CM，所以一出已經大賣。事隔三個月手機終於登陸香港，雖然售價待定，但觀乎當地賣$50萬韓圜（折合約$3,437港元），價錢合理，絕對係聖誕送禮佳品。

自訂LED燈圖案

機身設計上，NORi採用久違了的摺機造型，並提供粉紅、香橙、冰藍及深藍四款漸變顏色，單睇外形用色，已經迷倒不少少女。但原來佢嘅必殺技係機面嗰三排LED燈，各以5×15點排列，平時除可顯示日期時間及來電號碼外，用戶還可發揮創意，透過編輯器自訂LED燈圖案，或索性組成一些深情句子，女生見到仲唔開心到暈！另外，LED燈嘅光度及時間都可以調校，後者有8秒、30秒及3分鐘可選，校啱時間就會自動顯示，最啱怕醜仔用來示愛。

Lomo特效有驚喜

屏幕方面，NORi僅搭載2.8吋TFT，尺寸雖小，但顏色數量卻多達1,600萬，細芒下睇相反而更清更靚。而為照顧女士Snapshot需要，手機更提供130萬像素前置及320萬後置鏡頭，前者可玩視像對話之餘，仲可以用來自拍；而後者則支援美顏、全景、連拍及Lomo拍攝效果，當中Lomo就有卡通、黑白、懷舊、負片、掃瞄等多個Effect，效果即影即睇兼每次不同，充滿驚喜！惟留意機身並冇內置記憶體，所以要盡情玩盡情拍，建議買多張microSD卡傍身了。

多款社交網絡程式

說到制式，NORi支援GSM四頻及3G網絡，3.5G模組下載速度達3.6Mbps，基本上任何時候都能快速上網。另外，近年Samsung手機都強化交友功能，NORi雖沒有常見嘅Social Hub系統，但就預載了MSN、MySpace、Flickr、Facebook、Twitter及YouTube等社交網絡程式，方便隨時更新好友狀態。NORi還支援多工作業、Office文件預覽、英譯中字典及單位換算器等，以Feature Phone來說絕對五臟俱全。