Ovi Store遊戲　Kill Time過足癮

作為智能手機老大哥的Nokia，Ovi Store講Apps數量肯定唔夠iPhone App Store甚至Android Market多，不過勝在手機款式多，而且涵蓋晒高中低價市場，啱晒唔同Budget嘅用家。而近期Ovi Store亦為S60、S40系統加入不少新Apps，更有大量新遊戲畀大家單撈，由簡單易玩嘅《Animal Catapult Lite》，到經典嘅《Garfield's Day Out Lite》都有，等車Kill Time就最啱！

近年Nokia採取多線發展，一邊為新系統Symbian^3開發新軟件，而另一邊廂又繼續以S40、S60平台推出不同價位的手機，單計下半年，已有多部中價手機推出，所以Ovi Store嘅遊戲都會對應唔同嘅平台，與眾同樂。

《Demo Fishing：Off the Hook》深海大魚任釣

費用：免費　平台：S60 5th

小記自問冇閒情逸致出海釣魚，不過又想享受釣魚嘅樂趣同滿足感，呢隻《Demo Fishing：Off the Hook》就最啱玩。有齊大堡礁、亞馬遜河等地嘅大魚任你釣，而且仲可以換裝備，幾十斤嘅大魚都手到拿來，加埋個Fish Gallery畀你儲低魚獲，隨時都可以跟朋友分享戰績！

《Animal Catapult Lite》動物走難跳彈床

費用：免費　平台：S60 5th

話說有一群動物被獵人追捕，逃走期間被逼至懸崖邊，玩家就要幫呢班小動物成功越過懸崖逃出生天。故事雖然冇厘頭，不過以畫彈床方式幫動物跳過懸崖又幾過癮，最難係左邊不斷有動物跳崖，畫慢啲都救唔切班小動物。遊戲仲支援藍芽雙打，約埋朋友一齊玩就夠晒過癮！

《Garfield's Day Out Lite》加菲貓四出搵食

費用：免費　平台：S40

相信大家對加菲貓一定相當熟悉，牠好食懶飛又唔願郁，睇動畫已夠晒抵死得意。《Garfield's Day Out Lite》入面大家就有機會扮演呢隻肥貓，不過唔係齋瞓唔做，而係四出搵好嘢食。期間當然會有唔同嘅障礙物阻住你，你可以選擇跳過，或者直接飛份報紙埋去掟散佢，過癮又抵死！

《Bruce Lee - Iron Fist》截拳道打到嚟

費用：免費　平台：S40

李小龍不單止對武術電影有深遠影響，連電玩遊戲如《火影忍者》、《街霸》都周不時有疑似李小龍嘅角色出現。《Bruce Lee－ Iron Fist》就名副其實畀玩家扮演李小龍，目的係做臥底參加非法搏擊賽事擊退壞人。最特別係連佢嘅招牌飛踢都有，加上造型都幾神似，一於用截拳道贏個冠軍返嚟！

《Godzilla - Monster Mayhem Lite》哥斯拉再遇魔斯拉

費用：免費　平台：S40

雖然日本電影《哥斯拉》已經有成60年歷史，不過哥斯拉嘅巨型恐龍形象依然深入民心。電影內就見佢四處破壞，原來遊戲入面都係一樣，無論係腳踩或噴火，只要完全破壞整個版圖就可以過關，簡單得來又可以過足癮！最正係連王者基多拉同魔斯拉都會登場，大家可以打餐懵喇！

《Demo Mini Golf 99 Holes》打Golf有難度

費用：免費　平台：S40

先前睇亞運高爾夫球賽事，見到南韓勇奪四金真係好厲害。小記就唔識打高爾夫球，不過玩吓《Demo Mini Golf 99 Holes》都仲得。要控制力度同角度唔算太難，不過周不時有雪糕筒、風扇等障礙物阻住你，仲要有斜路、彎路等場地，計錯少少都入唔到！