率先玩PG　忠仔爆Seed

本周高達迷財運預測，一字記之曰：破！事關史上最高身價嘅PG模型—突擊自由高達（Strike Freedom Gundam）已經到港，仲會喺Gundam Expo有得賣。得Bandai Asia及瑞華行幫手，筆者有幸提早睇真身外，仲搵埋砌高達多過食飯嘅梁榮忠「忠仔」試玩，佢又點評價先？

本周隆重推出嘅PG突擊自由高達，唔只身價高，仲係史上最巨型嘅PG，兼且骨格超複雜，夠晒骨氣！忠仔自言玩咗Bandai模型咁多年，好欣賞廠方改良骨格嘅誠意，仲話骨格係一副模型嘅精髓所在，叫大家砌模型時要多啲留意骨架變化喎！

激讚連動 龍騎兵露底

「我最欣賞佢個連動骨架，部件一扯，就睇到佢成套組件拉出嚟，而且唔易扯爆，真係正到冇朋友！」忠仔一埋位試玩，就識得扭吓隻PG嘅肩甲、手腕同腳眼等位置，示範屈曲部件時前後裝甲連動嘅原理。同場指導嘅Bandai模型事務部負責人鈴木努，仲即席表演「龍騎兵系統」嘅奧妙，輕推黑色外甲，飛翅炮就識自動撐大，金色嘅骨架當場「露底」。不過忠仔好坦白咁講，新PG嘅可玩性肯定一流，不過「實用性」就另計，事關佢相信冇乜邊位粉絲間房，大到可以容納佢個「爆Seed」Look。

關節實淨 大隻冇位擺

被問及新PG有咩地方要彈，忠仔即時收起笑臉，好認真咁講：「模型係要有啲缺陷先好玩，因為你發現有問題嘅地方，先會諗辦法改到啱心水為止，玩到咁個人化嘅話，模型就變成一件藝術品。」忠仔補充話，除咗太大隻冇位擺之外，真係諗唔到新PG有咩缺點，皆因關節做得好實淨，尤其是背包連接兩邊各四組龍騎兵系統嘅榫位，完全夠力撐得起，而且展示台都好穩陣，抵讚！

射燈展示台 行貨先有

其實突擊自由高達都出過好多款模型，忠仔對邊款最有印象呢？「係1/60嘅全身骨架發光版，關節入面裝咗好多LED，駁咗好多線，一着燈就重現爆Seed情景，我都入咗一盒，我諗依家應該停咗產喇。」忠仔話好鍾意有發光功能嘅模型，鈴木先生即時推介新PG：「今次亞洲版行貨會跟一個射燈展示台，係我設計o架，而且日本本土都冇，配合埋鏡面貼紙，包你鍾意！」有心入貨嘅粉絲，記住揀行貨喇！

查詢：2433 1828（瑞華行）

Gundam Expo又嚟喇

每年一度嘅Gundam Expo，今年就喺聖誕檔期舉行，地點都係紅磡都會商場，除咗有2m高嘅大高達，同埋高達美女Cosplayer畀大家任影唔嬲。今年又有乜限定品模型先？忠仔就揀咗三款心水推介，分別係彩色透明版MG高達Ver2.0、金屬配色Robot魂00高達，以及透明甲BB戰士獨角獸高達，至於26號舉行嘅「模型世界盃」，佢仲會做埋主持，想知有邊款大作畀佢睇得上眼，到時就要捧場喇！

活動小資料

日期：2010年12月17日至2011年1月2日

時間：中午12時至晚上9時

地點：紅磡都會商場

費用：全免

動漫創潮語

無論係香港嘅「爆Seed」，或者內地及台灣嘅「爆種」，都係同義嘅新興潮語，意思就係「爆發自身潛能」。爆Seed一詞源於日本動畫《機動戰士Gundam Seed》，事關劇中嘅一眾男女主角，危急時會引發潛藏力量，呢個時候畫面會出現一粒爆破嘅種子，發動者隨之判若兩人，變到可以一敵眾，甚至將敵人「秒殺」嘅屈機境界，你今日又爆咗Seed未？