SLS AMG仲有得改？

由外型到內嘅平治（Mercedes-Benz）SLS AMG，係唔少人心目中嘅完美Dream Car，咁完美仲有得改？早前喺德國舉行嘅Essen改裝車展，專改平治嘅改裝大廠Brabus，就全球首展咗部SLS AMG Brabus Widestar。最明顯嘅改動地方，就係頭唇、頭泵把兩側入風口、前輪拱後面嘅散熱位、裙腳散熱位、尾翼，以至尾泵把底部嘅導流板，統統用晒碳纖維製成，唔使審，梗係為偷輕部車而設啦！就連四出式尾喉都係輕量化嘅鈦合金製品，喉管尾段只重12kg，比原廠輕咗40%之外，仲可以提升10hp馬力。

底盤都改埋

此外，就連輪圈都齊齊練輕功，四輪改用Brabus Monoblock F Platinum Edition製品，前、後尺碼分別係9.5J×20及11J×21，比原廠規格輕咗12%。由於輪圈規格有變，所以Brabus連底盤都改埋，將後輪距加寬咗20mm，並且追加氣動力組件，令車身後半部嘅兩側造型更流線。懸掛方面就由Bilstein出手，開發咗一套電子懸掛，駕駛者按個掣，就可以自行設定懸掛軟硬，車身高度最多可以Low低30mm，加強高速飛馳嘅威力。據知喺車展過後，Brabus隨即接受SLS AMG車主嘅查詢，安排加裝Brabus Widestar升級組件，詳情可到www.brabus.com瀏覽。