深入測試 馬力唔嫌多 Nissan Murano 3.5

對重視性能嘅車迷嚟講，馬力要求愈大愈Buy，所以日產（Nissan）嘅Murano唔只有入門版Murano Green 2.5（馬力170ps），仲有性能更高嘅3.5版本。筆者最近就同Murano 3.5度過咗四日嘅深入測試，去到鄉郊嘅Off-road路段，四驅系統喺260ps馬力支援下，依然如履平地，果然大得有道理！

今次測試嘅大部分路段，除咗入郊區，仲有吐露港及東廊等高速公路，路噪稍大，不過四驅系統帶嚟嘅穩定性，真係贏晒前驅（FF）或後驅（FR）車。另一方面，由於車身高度1,730mm，喺車群之中顯得鶴立雞群，車身高，視線自然望得更遠，所以就算有16噸嘅大貨車，或者40呎嘅貨櫃車喺側邊經過，壓迫感都比揸私家車細得多，駕駛自然夠信心。

四驅嚟料 夠力脫險

Off-road測試喺大埔大美督嘅鹿頸進行，路面凹凹凸凸，筆者先以30km/h左右慢速駛過，刻意製造輪胎打滑，四驅系統好快就嚟料，稍稍加油已經回復正常，令輪胎夠晒力脫離險境。之後嘅山路狀況都唔好得幾多，而且彎多路窄，不過四驅嘅穩定性足以一一抵銷，唔怪得真係會揸車Off-road越野嘅用家，都以四驅做首選。

至於耗油量方面，人人都知四驅車難免會大食啲，Murano 3.5又有幾大胃口？呢四日內多次往返大埔至將軍澳，車程以高速公路為主，而且全程開住冷氣，一共走咗差唔多420km，油費盛惠$650，計落即係$1.6/km左右，以一部3.5級別嘅SUV嚟講，其實已經有交代，甚至乎比筆者想像中「細食」。

唔識日文 按掣要記位

Murano 3.5唔只有SUV必備嘅大車廂，而且布局亦落足心機，好似雙天窗設計，前、後排乘客都感覺開揚；尾箱空間又足以放置最少三個大型行李篋，況且尾門有電動開關掣，就算閣下個子唔高，都可以輕鬆操作；中控台按鈕又夠大粒，易認之餘又唔會按錯。不過有讚亦有彈，由於輸港嘅行貨係日本版，唔少按鈕都用日文顯示，對大部分香港用家嚟講，只好花啲時間記住各個功能鍵嘅位置，斷估你唔會為咗呢幾粒掣走去學日文啩！

車檔案

車　　　型：五門五座位SUV

引　　　擎：V6

容　　　積：3,498c.c.

最　大　馬　力：260ps/6,000rpm

最　大　扭　力：34.3kgm/4,400rpm

驅　　　動：前置引擎、智能四輪驅動

傳　　　動：XTRONIC CVT-M6

懸　　　掛：（前）麥花臣 （後）多連桿

制　　　動：（前/後）通風碟

車　身　體　積：4,825×1,895×1,730mm

　　　　　　（長×闊×高）

綜合耗油量：9.3km/L

售　　　價：$465,800

查　　　詢：2262 1088（合誠汽車）