得閒圍脖

科技版記者貓科：

有朋友嫌用部iPad睇書太重太光，咁小記就建議佢正正經經買番部ebook Reader好過，好似Sony呢兩款喺日本推出嘅5吋Reader Pocket Edition（右），以及6吋Reader Touch Edition（左）電子書閱讀器，均採用E Ink Pearl屏幕，提供16段的高對比畫質顯示，支援6段文字大小縮放功能，顯示清晰又唔會傷眼，支援XMDF、EPUB、PDF、TEXT等電子書格式，單係內置嘅2GB記憶體，都夠收藏1,400本書，若然日圓回番少少，小記都會考慮。

科技版記者Alfred：

上個月底《孖寶》又出咗隻新Game《Mario Sports Mix》大玩體育運動，本來都諗住買隻返屋企煲，點知香港任記竟然話12月會推出中文版《Mario Galaxy 2》同埋限量發售中文版《Super Mario Collection》，於是即刻打消呢個念頭。皆因小記之前買落嘅日文版Wii遊戲，依家隻隻都出咗中文版，話唔定今次隻中文版都好快會到，為免再次中伏，都係睇定啲先！

科技版記者Vincent：

不經不覺仲有兩個多星期就到聖誕節，早前經過尖沙咀，發現聖誕裝飾已經準備就緒，仲傳來陣陣聖誕歌聲，係就係有氣氛，但前排氣溫仍然徘徊喺二十幾度，感覺好似爭咁啲。好在呢兩日急降至十幾度涼番少少，希望呢個冷鋒可以延續至聖誕、除夕，咁小記嘅大褸、長袖衫就可以上場，唔使着住短褲薄Tee過聖誕！