HT 12" Spiderman三長兩短識噴絲

HT 12" Spiderman三長兩短識噴絲

正所謂「能力愈大,責任愈大」,呢句說話除咗蜘蛛俠啱用,套用喺Hot Toys都掂!隨住技術提升,粉絲們對Figure要求亦愈嚟愈嚴苛,難得係HT未有令人失望,推出一隻比一隻更像真嘅可動Figure。最近再向難度挑戰,選擇以超級英雄蜘蛛俠作為MMS系列嘅最新成員,無論活動能力及蜘蛛衫嘅像真度都領先同業,呢隻「蜘蛛精」,真係好大引誘喎!

貼身衫試足半年

作為Marvel嘅經典英雄人物,蜘蛛俠Figure不計其數,當中以Medicom嘅12"最受歡迎。不過玩過實物嘅話,就會發覺Medicom都係改唔到厚身衣料嘅習性,令Figure徒具其形,擺動時難以伸展。今次HT嘅過人之處,在於全新設計嘅蜘蛛衫;據廠方表示,新衫經過半年嘅反覆測試,先做到既薄身,又有高度拉扯性,而且冇縫兼冇拉鏈位,手工馬虎少少都做唔出。為咗增加像真度,HT仲喺布面加入暗花及反光效果,並透過滴膠技術做出蜘蛛網,相似度拍得住電影版嘅蜘蛛衫戲服。

打黑底免穿崩

素體方面,雖然只係一般TrueType Body,即係有30個關節嗰款,但喺彈性衣料之下,做任何高難度動作都唔會爆衫,最細心係廠商為免關節位外露,喺蜘蛛衫之下穿多層打底黑衫,將「露餡」機會大大減低。另外,玩得蜘蛛俠當然想噴絲,以往好少Figure做得到,HT就特別做咗7條蜘蛛絲,當中「三長兩短」可以逐條收喺手腕位,模擬噴絲效果。隨盒地台亦好抵讚,並非一般嘅橢圓形黑板,而係參照電影第三集嘅大廈頂樓設計,大大件兼有舊化,擺甫士一流。

Gilbert

圖中為試辦款式,與正式推出的版本或有少許分別。零售價︰$930預訂價︰$890推出日期︰2011年第2至第3季查  詢︰2388 4677(玩具狂熱)

蜘蛛絲可以插喺手腕位,做出發射甫士。

沿用TrueType Body,上身着埋打底衫,以免關節穿崩。

蜘蛛絲用滴膠製成,逼真之餘,而且點扯都唔斷。

背脊縫咗蜘蛛Logo,唔係就咁印上去咁求其。

隨盒有九隻可換手掌,以及七條蜘蛛絲。

地台參照電影第三集嘅大廈屋頂設計,製作認真。