3D Plasma iDTV組合 首玩Blu-ray錄影

依家影音界個個品牌都玩3D，所以Panasonic最新的G系42吋3D Plasma iDTV TH-P42GT20H就追加埋2D轉3D功能，並擁有5,000,000:1超高動態對比度及極靚色彩顯示，如果想有更完善嘅配套，可以配埋全港首部Blu-ray錄影機DMR-BW880，同時錄低兩條不同數碼頻道嘅節目！

雖然唔少影音迷都欣賞Plasma電視出色嘅黑位表現，但由於屏幕尺寸太大嘅關係而轉投LED背光電視陣營，今次呢部TH-P42GT20H就以42吋的細機姿態登場，兼玩埋3D顯示，Plasma用家就再冇藉口唔升呢！

新增2D轉3D功能

向來Plasma電視的黑位表現都會較LED背光電視出色，今次Panasonic新3D Plasma iDTV TH-P42GT20H在設計上就進一步照顧到用家嘅需要，首先屏幕尺寸只有42吋，相比之前動輒50、60吋的款式，更適合香港家居環境；另一優點是追加2D轉3D功能，即使是普通數碼廣播嘅高清節目，都能「升級」成3D影像，唔使下下等到出3D Blu-ray碟先有戲睇，平時睇吓3D新聞或3D劇集都幾有趣！其他配套都做得相當唔錯，例如對應VIERA CAST功能，可連接上網瀏覽YouTube影片或Picasa相片，亦能接上鏡頭玩Skype視像通話。

黑位表現更實淨

發布會上廠商更即場以TH-P42GT20H跟另一品牌嘅3D LED TV並排比較，在顯示3D畫面時，TH-P42GT20H無論在色彩跟層次感方面都有較佳表現，尤其在黑位顯示上的分別就更明顯。主要原因是今次Panasonic用上Neo PDP特亮屏幕，動態對比度提升到5,000,000:1，而且用上600Hz Sub-field驅動系統及智能畫面創造功能，減低殘影現象，因此播放時均顯得十分流暢，另外只需連上USB硬碟機就可進行即時及預校錄影，非常方便。

雙頻道藍光燒錄

DMR-BW880打着全港首部Blu-ray錄影機之名，大家可以揀選以內置500GB硬碟機或以BD-R光碟錄製數碼頻道或內容。每張Blu-ray碟最高可錄製35小時HM模式高清影片，夠錄晒成套電視劇；更內置兩組數碼廣播調諧器，可同時錄影兩條不同數碼頻道，唔使同家人爭機用。另一好用之處係，只需以HDMI線將高清數碼攝錄機接駁到DMR-BW880，即可將AVCHD高清片轉錄至Blu-ray碟上，方便跟朋友分享。

至於影片播放功能方面，內置的「PHL基準色度處理器Plus」，配合高準確度的4:4:4訊號處理技術，可以原汁原味地重現電影畫質，提升電影感。此外，還支援Dolby Digital Plus、Dolby TrueHD及DTS-HD Master Audio Essential等高清音效解碼，而96kHz環迴音效重組技術亦有助提升音效質素，聲畫表現兼備。

查詢：2833 0955