得閒圍脖

HaLam：

最近深入沙田某百貨公司的大割引「戰場」，為的就是一隻特價皇帝蟹……腳！我對於蟹這種生物一直有種情意結，奄仔蟹、大閘蟹、麵包蟹、黃油蟹等無一不歡，對住這隻只需300大元的「美腿」，當然不能錯過！一輪大戰後，再花了一頓力氣斬件解凍，此「腳」確實得來不易，但當入口時那股鮮味湧上，Juicy得令人不禁大叫「好正」時，就不禁想起一句：辛苦「搶」來志在食，確實一點沒錯！最後還得多謝好友一同分享，倍感美味！

Anthea：

眾多假期之中，我最鍾意充滿浪漫感覺嘅聖誕節，皆因屆時商場會有好多應節又免費嘅拍攝熱點嘛！好似今年咁，市道暢旺，各大小商場都以「超揼本」嘅裝飾來賀聖誕，而最吸引我嘅就係卓爾廣場嘅布置。點解？好簡單！全因我係三眼仔超級Fans，咁啱呢個商場就以《反斗奇兵3》為主題，有成三大隻立體三眼仔豎立喺度，簡直係一個超Good嘅影相位，所以大家話，我又點可以唔到此一遊呢？

Ivy：

上周六與友人閒逛中環，唔覺意行到中區警署，碰巧遇着香港攝影節開幕，場內有茶點招待。我同朋友各自拎咗杯紅酒，在微醺的狀態下觀看香港最早期的照片，感受菲林機的踏實質感。然後再移「肉」步，走到旁邊的域多利監獄睇「DETOUR 2010」，看了展覽，又塗了油畫，最後在手作仔攤檔獲得「Don't feel guilty to spend」的Sticker，噢！一切都正合我意，我要唱首蘇打綠的《無與倫比的美麗》來結束這完美的一天……