愈嚟愈Grand　Mercedes-Benz 2011 R350L

on.cc 東方互動主頁

今時今日揀七人車，再唔係獨沽一味日本型號，事關唔少歐洲名牌都有份！好似平治（Mercedes-Benz）R-Class唔只由六座變七座，新到埗嘅2011小改版仲換咗前後新Grand Look，加上可靠性能及出色嘅車廂設計，揸開日本MPV嘅車迷都難免有變心嘅衝動。

現役嘅平治型號都換晒新面譜，2011 R-Class亦唔例外，車頭線位由圓變方，鬼面罩Size亦變大咗，換埋粗身橫框，成個Look變得硬朗咗，而且加埋LED日間行車燈，目光更明亮，如果範圍再大啲就更理想。唔只頭燈改變，就連尾燈組都係新設計，襯埋整合喺泵把內嘅雙出式方形尾喉嘴，頗有旅行車嘅Sporty感覺。

分割式後排　夠闊落

作為七人車，車廂空間當然唔可以失禮，R350L就用咗2+3+2布局，難得係後排都有唔錯嘅空間感，而且係獨立分割，寬敞程度絕對唔係一般七人車嘅Dog Seat可比。筆者最鍾意係車頂嘅雙天窗，前、後排乘客都受惠，開揚咗，心情都豁達啲啦！至於尾箱容量亦令人滿意，七座位狀況下都有414公升，收起中、後排，就可以擴充至2,436公升，放多幾個高球袋或者大篋都掂。

性能依舊　靠晒3.5 V6

性能方面就維持原狀，繼續由3.5公升V6引擎發功，馬力272hp，扭力就有35.7kgm，配合7G-TRONIC自動波，8.2秒完成0-100km/h，綜合耗油量就係11.1L/100km，計落每公里只係$1.6，以車重2,230kg嚟講，都算「細食」啦！至於車價方面，$745,000呢個價位，當然與日系同級對手有一定距離，不過話晒係平治行貨，加埋以上嘅吸引賣點，確係一分錢一分貨。