1,410萬像素SH-01C玩埋Lomo假大眼

1,410萬像素SH-01C玩埋Lomo假大眼

日系手機外形設計變化多端,而且功能永遠走在最前,千萬像素、防水防塵、高清拍攝等功能已成為基本配備,莫講話歐美手機,連出名創意多多嘅韓國手機亦拍馬都追唔上。所以當新機DoCoMo SH-01C嘅拍攝像素能突破1,410萬,小記一啲都唔覺得出奇,奇就奇在佢竟然玩埋美顏模式同Lomo特效,影人影景同樣靚爆鏡!

手機像素愈來愈高,特別係日系機,像素更早於去年已跨進1,200萬,而在DoCoMo一眾冬季新機中,由Sharp研發嘅SH-01C絕對係當中亮點,皆因拍攝像素高達1,410萬,創了業界紀錄,若比較解像度,就幾乎高iPhone 4三倍!

1,080p全高清攝錄

1,410萬像素即係有幾大?換算為解像度,即有成4,320×3,240;點數更多,相片自然更清更細滑,即使放大至12R或更大Size,亦不會見到狗牙出現。當然依家未必會有人曬出嚟睇,但在出名色準嘅3.4吋AQUOS屏幕下,相片就相當銳利,大膽講句,觀感唔會差得過iPhone 4個Retina好多。另外,手機採用CCD作為感光元件,先天已靚過CMOS多多聲,而且在ProPix影像處理器幫助下,相片光暗、雜訊都會自動修正;加上支援1,080p高清攝錄,講拍片暫時無人能及。

寵物模式 影大頭狗

拍攝模式方面,日系機一早已玩人臉對焦,SH-01C就支援埋一笑即拍及Beauty Mode,後者設有美瞳、美白、瘦臉3種效果,影完後可逐級調校,真係豬扒都變女神。嫌影人影到悶,唔緊要,佢仲有個「寵物模式」,只要見到狗狗入鏡,系統就會自動對焦,至啱用嚟幫愛犬影番輯沙龍。至於其他特效,不得不提9大Lomo Effect,包括魚眼、花火、懷舊、負片及模型等等,當中又以扮移軸鏡嘅模型效果最好玩,影景必試!

來電閃燈 一米防水

功能以外,SH-01C外表同樣引死人,例如機殼就有純白、玫瑰紅及寶石藍可揀,而且每款機面都有漸變效果,在陽光底下顏色會由深轉淺,驟眼看相當低調。然而,背後佢卻浮誇到爆,事關面蓋原來暗藏96盞LED燈,來電或開蓋時都會閃出藍、紅、綠三色圖案,用戶更可自訂閃爍效果,保證閃爆全場。另一方面,日系機愛潛水,呢方面SH-01C亦支援IPX7防水標準,即可在1米水深下正常運作30分鐘;雖然冬天未必啱用,但落大雨時可以照傾照講,就唔係部部手機都做到。

機檔案

制  式︰GSM四頻、WCDMA

內置屏幕︰3.4吋1,677萬色有機EL

480×854解像度

鏡  頭︰1,410萬像素CCD

記 憶 體︰內置152MB

支援microSDHC記憶卡(最高16GB)

對外連接︰藍芽2.0、USB 2.0、7.2Mbps HSDPA

通話時間︰200分鐘(GSM)、220分鐘(3G)

備用時間︰250小時(GSM)、460小時(3G)

體  積︰112×50×16.9mm

重  量︰138g

查詢︰2374 0618

Gilbert

機背有齊1,410萬像素鏡頭及閃光燈,規格為目前業界最高。

可拍高清片之餘,仲內置埋HDMI介面,可將影片接駁到大電視慢慢睇。

手機可變成座枱形態,此時介面會轉為Touch Screen,惟反應就認真一般。

$4,080

試相區模型效果扮晒移軸鏡玩超淺景深,相中汽車變晒做模型車,過癮!

美顏效果提供美瞳、美白及瘦臉效果,而且每個都有3級調校,影完勁似卡通人物。

花火效果把相中任何發光位置化成線狀花火,就算日光日白都有閃閃星光效果!

魚眼效果學足Lomo玩魚眼,相中人變晒形。若想效果再誇啲,建議貼近臉部影。

機面有成盞LED燈,並以12×8點陣式排列,來電時閃閃令,極為浮誇!

內置遊戲唔算多,《Ridge Racers》係其中一款。

SH-01C亦有計步器,可計算步行後消耗的卡路里。

「寵物模式」最啱影大頭狗。