《新體感腦力鍛鍊》手腳並用變身90後

除了一眾由任天堂自己開發的遊戲軟件外，由日本東北大學教授川島隆太監修的《腦力鍛鍊》係少有可在NDS上大賣的第三廠商遊戲軟件。今次川島教授過檔全體感Kinect平台，推出要用身體動作答問題的Kinect遊戲《新體感腦力鍛鍊》，既考腦筋亦考手腳協調，大人小朋友都啱玩！

可能大家之前都有玩過NDS的《腦力鍛鍊》遊戲，以觸控筆在畫面上篤出正確答案，問題唔難，但都要大家動下腦筋去回答問題，據說仲可以防止老化，今次更加入埋體感設計，所以話打機都唔一定無益。

郁身郁勢做動作答問題

轉移到Kinect平台後，除了要考腦筋之外，由於要用身體動作答問題，如用左手跟右手當成時鐘的時針及分針來顯示時間，更要考埋全身協調，對於成日坐在辦公室的OL或者長者都好適合；而且《新體感腦力鍛鍊》更會推出繁體中文版，唔使再好似以前咁只得日文或英文畫面，依家個個人都睇得明。

《新體感腦力鍛鍊》遊戲內容共分為四個部分，即判斷、記憶、數學、反射四大類別，如比較兩組物件揀選答案來訓練判斷力；靠回憶之前畫面來訓練記憶力；透過畫面上顯示的算式，計算出正確答案來訓練數學運算能力；另外亦可透過尋找應有的次序來訓練反射能力，玩遊戲時需要同時運用全身肌肉，兼能鍛煉左右腦。

玩法雖然簡單，但遊戲模式都有唔少選擇，例如類似以往NDS版的「腦年齡測試」，可以持之以恒每天監察腦年齡的進度，愈玩愈「後生」，一於向着90後目標進發！另外遊戲亦設有練習模式及隨機挑戰模式，可以先自行鍛煉才挑戰對手。

類　　型：智力

開　　發：Namco Bandai Games

平　　台：Xbox 360 Kinect

推出日期：已推出

售　　價：$339

查　　詢：3071 4868