HotCha青春貪靚怪

女子組合HotCha青春可人，一曲《大場面》更唱到街知巷聞。雖然因工作需要，小妮子們都打扮成熟，但其實內心跟同齡少女一樣「愛靚唔愛命」，隨身也帶着各式化妝品及扮靚工具，務求時刻以靚樣示人。貪靚以外，她們亦不忘以書本及音樂為自己增值，如此好學，怪不得可在娛圈站穩陣腳！

剛剛忙於公司年度演唱會的HotCha，今年可謂豐收年，既忙於拍攝TVC廣告，亦要出席各大商場活動「搵真銀」。不過商業活動以外，她們亦積極裝備自己，例如Regen就有機會在處境劇《有房出租2》內磨練演技；Crystal及Winkie則經常擔任電台客席DJ，口才日益進步。小妮子們更謂明年在歌唱事業上會有新突破，保證能令粉絲們看見耳目一新的HotCha。

三姝各有扮靚工具

工作不斷，即使青春少艾及天生麗質也要好好保養，當中最貪靚的Crystal扮靚工具就裝滿整個手袋，「眼藥水用嚟保持雙眼明亮、黑超遮黑眼圈、化妝掃則補妝時用……」，如數家珍；反而Regen則注重手部護理，出街亦不忘帶備Baby Lotion密密搽。相比化妝，Winkie就愛用靚爆飾物，耳筒要火紅色，八達通亦要鑲滿Bling Bling閃石，不過佢話這些都是Fans送，所以隨身攜帶喎！

On Regen

雙眼皮膠紙　地上最強

「坊間好多雙眼皮膠紙易甩又易斷，呢款我最鍾意，除了唔易甩，柔韌度仲相當高；最重要係容易上色，化妝時更加自然，個人認為係世界最好用嘅雙眼皮膠紙。」

盜墓小說　引發幻想

「我好鍾意睇鬼古，呢本《盜墓筆記》係朋友借畀我，一套12冊環環緊扣，故事情景引人入勝，我要不停追看。最正係好有幻想空間，對我演戲亦有幫助。」

Baby Lotion　積極潤手

「唔好睇我皮膚咁好，但其實好怕乾燥，握手時好怕畀Fans話我雙手唔滑。所以我一有時間就拎Lotion出嚟搽，其中最愛Baby Lotion，又香又唔立。」

On Crystal

Marc Jacobs銀包　男裝女用

「我份人好亂，以前啲銀包太細，搞到散紙同卡片周圍擺，好易唔見；朋友知我論盡，就喺美國買咗呢個銀包返嚟送畀我。雖然個銀包超大兼係男裝，但我依家咩都可以放落去，方便到暈！」

眼藥水　消除紅筋

「我有近視要戴眼鏡，但入行後要轉戴Con。長期戴好傷眼，所以我隨身會帶住支眼藥水，一澀就滴，紅筋從此遠離我。」

Cheap Monday黑超配襯Bob頭

「以前我唔戴黑超o架，就算入咗行都唔鍾意戴。但我最近剪咗個齊蔭Bob頭，就發覺呢副黑超同新髮型好襯。而且呢排唔夠瞓，惟有出入都戴住黑超啦！」

無名化妝掃　最有感情

「化妝袋內最愛嘅一件扮靚工具就係呢支掃，它跟咗我幾年，雖然已忘記係咩牌子，但用開有感情，依家我唔見咗佢會周身唔自在兼亂發脾氣，我直頭當佢係護身符。」

On Winkie

Monster耳筒粉絲心意

「公司鼓勵我哋聽多啲歌，所以隨身一定帶耳筒。Monster耳筒出名靚聲，我一直都好想買，但價錢實在超出預算，難得Fans知我鍾意又送畀我，感動死我嘞！」

Marie八達通藏品之一

「Fans們都知我鍾意Disney卡通，當中又最鍾意Marie，計計埋埋屋企起碼有過百件收藏品。呢款八達通匙扣都係Fans送，成隻Marie滿布Bling Bling閃石，就算不常用，得閒拎出嚟望吓都開心到爆！」

Samsung MP3 練歌必備

「呢部Samsung YP-P3係出席活動時大會贈送，我哋每人都有一部。雖然已經唔係新款，佢聲靚之餘仲錄到音，方便我哋練歌時錄低佢重溫。」