拉打迷Mac哥影月上身

玩Cosplay係後生仔嘅專利？筆者就話未必喇，最近認識咗一位朋友，佢平日係一間玩具批發公司嘅老闆，日理萬機，但係一得閒就參加Cosplay派對，搖身變成幪面超人影月，搞到個個排隊爭住同佢影相！佢係邊個？咪就係當年喺車仔檔賣玩具貨辦起家、依家做咗老細嘅Mac哥囉！

幪面超人「拉打」真係「毒」，Mac就係萬千嘅「中毒者」之一，佢直言：「我鍾意玩具應該係由新一號開始。」佢細個同其他小朋友一樣，對當年喺電視熱播嘅幪面超人入晒腦：「當時好多細路仔冇諗過超人變身之後，勁到三拳兩腳就打到啲敵人半死，仲會跳上幾層樓咁高出埋『風雷電』，將怪獸打到變柿餅，好震撼感o架！到《Black》播嗰陣，我已經投身社會，先正式有錢追拉打夢。」除咗新一號，Mac哥亦沉迷Black嘅宿敵影月，當年節衣縮食，仲試過用人工三分一嚟買一件拉打玩具，當時買落嘅合金影月仲一直陪到他依家，最近仲幫自己訂做咗一套金屬感十足嘅影月衫，實行自己過足拉打癮。

靠星戰翻身

興趣還興趣，Mac哥又點樣將人哋覺得「唔等使」嘅玩具，變成一盤生意，由做貨辦跳蚤檔，發大到擁有星戰玩具香港獨家發行權嘅連鎖店老細呢？其實佢最初都係打工仔一名，辛辛苦苦儲落嘅積蓄，金融風暴一到就吹走晒，喺最失落之際，就係靠玩具爬番起身。

「金融風暴之後，知道賣星戰產品嘅利錢少咗一大截，搞到冇人願做，自己就膽粗粗拎嚟做。」就憑薄利多銷嘅策略，Mac哥嘅星戰生意愈做愈好，2002年仲做埋本地獨家發行商。「可能對得多啲星戰玩具，搞到自己都鍾意埋一份。」第三集《武士復仇》就最令Mac哥着迷，佢亦搜羅咗唔少1983年嘅星戰經典玩具，唔少珍藏品仲有演員親筆簽名，有錢都買唔到！

睹物念親恩

玩具唔只係Mac哥嘅興趣、事業，仲係一份親情嘅連繫，Mac說：「細個同爸爸嘅關係比較疏離，對爸爸嘅事亦一知半解，只知道佢係一個好忙嘅商人，好少有時間陪我。」言談間，Mac哥難掩追憶之情。後來爸爸過身，Mac哥從遺物中發現父親曾經係國民黨將軍！「我記得《太空保衞者》嘅故事中，主角嘅爸爸就係一個將軍，失咗憶，唔知跟自己並肩作戰嘅人就係自己個仔，個仔亦唔知呢個隊長係自己老竇。」感同身受之下，Mac哥四出搜羅呢套卡通嘅舊玩具，仲希望攞到呢套卡通玩具嘅版權，填補對至親嘅思念。

合家歡Party

玩玩具玩到咁有情有義，Mac哥都好想同大家分享自己嘅玩具回憶，原來佢已經揀咗唔少珍藏，準備喺12月4日及5日嘅上午10點到下午6點，於灣仔合和中心廣場嘅Toys Party展出。呢項活動免費入場，聽講到時會有人咁高嘅大Figure壓場外，仲有着住拉打衫及高達造型嘅Cosplay粉絲同大家合照，Mac哥話最想見到一家大細入場，等大家可以藉玩具共享天倫樂，欲知活動詳情，可到www.qre.com.hk瀏覽。