《芒亨3rd》魔物亂入挑機

相信好多朋友都已經單撈咗《芒亨3rd》體驗版進行熱身，甚至約埋老友「集訓」。事關今集大部分武器用法同出招都做咗調整，例如追加咗「毒瓶」技能嘅斬擊斧以及擁有「曲射」嘅弓手，不過最特別都係新增嘅魔物亂入系統，屠龍後隨時都會有新怪物出現，難度大大提高。

自從《芒亨》於06年推出後，大家都沉迷响呢種爽快接Job嘅遊戲世界，仲搞到一大班機迷組隊上Cafe或麥記煲碟屠龍，而今集就有更多強悍魔物等大家挑戰，加埋十種同行貓，獵人們又點會唔磨拳擦掌，等聽日行貨一出就大開殺戒先？

強勁魔物小心秒殺

呢一集《芒亨3rd》冇得打水戰，但係就新增溪流地形，而且地形起伏、地圖連結同怪物分布會有啲唔同，所以唔好以為見慣見熟就好易適應，最正係新增咗完成任務後，會有新魔物隨時亂入嘅特別任務，大家屠龍後唔好咁快放軟手腳，要做足心理準備再戰。另外，講起呢集最具代表性嘅魔物，要數雷狼龍同尾鎚龍。佢哋除咗體形龐大，招式霸道之外，雷狼龍在月夜更識得放藍白色電擊，劈中即被秒殺；而尾鎚龍嘅超大範圍橫掃攻擊，畀佢扑中實死冇生，仲有凍土嘅冰碎龍，火山地帶嘅亞種黑龍等等，所以話千祈唔好諗住單拖，分分鐘一下就被KO！

同行貓全副武裝幫拖

今集同行貓元素會作進一步加強，跟以往打怪時行行企企唔同，呢次同行貓會着住全副武裝一齊出去狩獵。玩家狩獵怪物時獲得素材生產武裝後，用剩餘物資「端材」就可以到武器防具店幫隻貓整武裝，而且同行貓更會透過戰鬥學識唔同技能，作戰時大派用場！另外，單人玩時可以帶最多兩隻貓，或者組織4隻同行貓叫佢哋自己出去狩獵，完成任務後仲可以幫大家增加素材添！如果要培育頂級同行貓，就要努力建設農場，提升訓練場畀佢哋學多啲嘢。

幫溫泉、飲品店升呢

今次《芒亨3rd》村落會變成充滿日式風情嘅優克摩村，跟以往一樣有齊基本設施，農場會新增捉蟲籠，冇魚餌時又可用假餌釣魚。而集會所就新增露天浴場，入去浸溫泉暖下身就可以得到提升體力同精力嘅「溫泉效果」，而且溫泉嘅泉質仲可以靠「溫泉任務」來改良，分分鐘浸完會有意想不到嘅效果。另外，掌櫃亦有「飲品任務」畀大家挑戰，完成後飲品店會提供更多選擇，供任務使用。

遊戲檔案

名　　稱：Monster Hunter Portable 3rd

發　　行：Capcom

類　　型：動作

平　　台：PSP

推出日期：12月1日

售　　價：$358

查詢：2366 1001