蘇斯 海盜船P玩得癲
係人都唔鍾意上賊船，不過來到突尼西亞（Tunisia）小鎮蘇斯（Sousse），人人都爭住上賊船，何解？皆因小鎮面臨一望無際的地中海，最適合揚帆出海，大家還可坐上仿古海盜船，船上有大班海盜陪你玩，仲識功夫神打；興之所至更可由甲板玩到落水，又或食大餐、跳勁舞，好似開Party咁熱鬧。
小鎮蘇斯位於哈瑪麥德海灣（Gulf of Hammamet）的南面，景色優美，距突尼西亞首都突尼斯（Tunis）以南約140公里，坐火車約2小時可達，是當地人和遊客的度假勝地。
二樓跳落水
來到蘇斯，已看到碼頭停泊了多艘仿古海盜船，仰望船身足足兩層樓高，船上更有骷髏骨、海賊雕塑作裝飾，果然似模似樣。上船後第一時間走到二樓甲板，欣賞沿岸充滿地中海特色的建築物，在陽光照耀下，海風吹拂，感覺極之寫意。
這時身旁的外國靚女紛紛換上比堅尼，原來船行約45分鐘後就會到達海中心，不少人會由二樓甲板直接跳落海暢泳，嘩，咁高，望落都腳軟。但見型男索女冇有怕，個個大玩花式跳水，我都唔執輸，一二三跳出去，撻落水面，衝擊力震到有點頭暈，不過終於可以在地中海游水，總算圓了心願。回到船上，海盜們一早準備好豐富午餐，有熱辣辣的燒魚、沙律配麵包，可能游完水特別肚餓，味道都唔錯呢！
海盜玩神打
海盜們唔止用燒魚招呼大家，還用刀行住你條頸……佢哋七情上面交足戲，原來同你玩下啫！接着船上播出強勁音樂，海盜們邀請靚女齊齊大跳草裙舞，還拉一些猛男一齊玩，大家又叫又跳，場面熱鬧得很。
跳完舞，海盜又揮動大刀，兇神惡煞地走出來，今次原來要玩神打！西方國家都有神打？只見其中一個海盜首先趴在幾把刀上，然後請在場女士踩背，維持10多秒後，竟若無其事起番身，即時引來全場觀眾鼓掌。神打表演陸續有來，海盜又將塊鐵片架在肚皮上，即場請來型男用手壓住手柄，然後做掌上壓？看得全船人都目瞪口呆。這班海盜為了娛樂大家出盡百寶，咁辛苦，實在抵讚！
仿古海盜船
費用：US$60（約HK$468）起
市集燒手袋
回到蘇斯市舊城區，購物癮發作，於是到Medina市集Shopping去。市集的小店都藏身於阿拉伯式建築內，甚有特色，突尼西亞的皮革用品出名平靚正，難怪市集一間小店內已有過百款皮製手袋、拖鞋，花多眼亂令人不知怎揀。小販們除了講價唔黑面外，為了證明自家皮具是真皮，更會在你面前用火機燒手袋過你睇，咁有誠意想唔幫襯都唔得；不過我都有殺佢價，拖鞋講到半價，手袋就講到6折，滿載而歸。
我即場換上新買的皮拖鞋，軟熟又舒服，還不用60元港幣，咁嘅價錢香港買唔到。喜歡吃果仁的朋友，推介你買這裏的焦糖杏仁，市集內有幾個糖果攤檔，遠遠已聞到焦糖的甜香，即日鮮炒，食落香甜又脆口，當然要即時買番幾包做手信啦！
旅遊資訊
簽 證：持特區護照或BNO均毋須簽證
旅行團：美麗華旅遊的突尼西亞古羅馬、阿拉伯帝國考古、尋寶之旅9至10天團，暢遊突尼斯、蘇斯、開羅安、瑪特瑪他、杜茲、吉利特、吐澤、伊利捷、哈瑪麥德等，團費HK$9,999起。 查詢：8200 2299
貨 幣：1 Dinar約兌HK$5.4
天 氣：12月份氣溫約17℃-25℃
時 差：慢香港7小時
在仿古海盜船上，全程播放強勁音樂，型男索女大跳草裙舞，熱鬧得像開P一樣。
蘇斯是沿海城市，藍天白雲靚沙灘是賣點。
船上的膳食不錯，有齊燒魚、麵包跟沙律，都幾好味呢！
二樓甲板夠晒開揚，大家可以同陽光玩遊戲。
這位仁兄大鵬展翅式插水，有姿勢有實際。
鐵片架海盜肚然後請猛男做掌上壓，同心口碎大石有異曲同工之妙。
海盜出來了，還要用刀行住你條頸……哦！玩吓啫！
舊城區的市集，人來人往非常熱鬧。
小手袋顏色多多又實用，襯衫一流。原價25 Dinar（約HK$135），可殺價到15 Dinar（約HK$81）。
為證明係真皮，檔主會用火機燒手袋過你睇。
平靚又舒服的皮拖鞋，原價20 Dinar（約HK$108），殺價到10 Dinar（約HK$54），抵着！
在海上不時遇到其他海盜船，幸好都只是遊覽船。