HT 10周年　任朋擺布

曾經我都係一個「20世紀少年」，無心向學，每日沉迷漫畫及Figure；結果，時間同金錢都奉獻咗畀《20世紀少年》及Hot Toys。今年適逢係呢兩個童年回憶嘅10周年紀念，估唔到兩者會暗中合作，共同炮製出12吋「朋友」Figure！作品由浦澤直樹親自監督，並由HT兩大名師親手製作，作為兩幫粉絲，呢個「朋友」又點可以唔收買呢？

電影版《20世紀少年》千呼萬喚，日本大收百億，於是抱住期望入戲院，結果兩個鐘瞓着收場，皆因節奏太慢，將24卷單行本嘅神髓白白浪費，最重要係「朋友」竟然着住筆挺西裝出現，令一眾Fans失望。相反，HT就深明市場需求，今次Figure由頭雕、服裝到道具都取材於漫畫版，發表後連日本《Figure王》都專登做詳細報道，浦澤老師更罕有接受訪問，證明神似度得到官方十足肯定。

神級塗裝　PVC現布紋

咁點似法先？首先深灰色西裝用咗寬膊剪裁，正正有啲衣不稱身，先至忠於漫畫版造型嘛！而且白色頭巾印咗「友民黨」標誌，齋睇已經令擁躉嘅腎上腺素急升，最難得係由JC.Hong塗裝，普通嘅PVC膠都做到布藝質感，摺紋仲有立體感，真係鬼斧神工。至於頭雕由日籍大師林浩己主理，此君擅長雕刻卡通人物，今次炮製「朋友」自然得心應手，廠方亦預咗一個頭嘅話，玩家實唔滿足，所以送多個服部哲也嘅頭雕，隨時令「朋友」現真身。

有餡預言書　唔係得個樣

漫畫中「朋友」唔係包頭巾就戴面具，造型多變，化身Figure自然大把嘢玩，HT版就有鹹蛋超人及忍者小靈者面具各一個，以及曾經喺「朋友樂園」出現過嘅蛋頭Look，屈指一算，單計面相已經有五款你玩！其他道具就有死光槍、遙控器、孿湯匙及友民黨徽章等，最令人感動係嗰兩本預言書，廠商竟然有心到以1/6比例還原出嚟，仲印埋所有預言，製作認真成咁，相信「健次一派」亦難分真假！

查詢︰2388 4677

故事橫跨50年

《20世紀少年》係日本漫畫大師浦澤直樹嘅長篇作品，連載時間長達八年，故事背景亦接近50幾年，由1970年代日本搞萬國博覽會開始，到2018年完結，堪稱史詩式巨著。故事講述「健次一派」與「朋友」之間嘅鬥爭，由於不乏地球保護隊、預言及機械人等元素，好受男讀者歡迎。另外，出場角色多不勝數，日本電視台（NTV）於是喺2008年耗資60億日圓，將漫畫拍成三部曲電影，當做開台55年嘅紀念作。

同場加映：型爆創戰紀

晨早張揚嘅《電子世界爭霸戰》續集《創戰紀》（Tron：Legacy），今年聖誕就會上映，唔少人睇過預告片，腦海只有一個字—型！更型嘅係HT已經部署《創戰紀》12吋Figure，唔只有主人公Sam Flyun，連部電單車都會整埋，附送兩個頭雕之餘，全身仲滿布LED藍光，現已接受預訂，超期待！