未來劍俠 MG 00 QAN（T）

《機動戰士高達00》終於以劇場版作為系列嘅完美終結篇，為呢套播足三年嘅超人氣高達動畫畫上句號，今個月仲喺香港上映，不過聽聞好多粉絲都撲唔到飛，點算？唔使愁，好彩仲有大量劇場版商品登場，最期待、最具分量嘅就係MG版模型00 QAN（T）。

搭載雙太陽爐係00 QAN（T）嘅最大特色，既要展現當中嘅精密構造，又要跟足動畫嘅修長機身設計，加埋高度可動性，原本都好擔心呢款MG會唔會周身刀、冇張利；親自砌過之後，先發覺原來都係杞人憂天。

合體變形GN Sword

仲記得劇場版之中，00 QAN（T）把「槍劍合一」嘅GN Sword Ⅴ嗎？劈完又可以射，仲可以同六組浮游兵器GN Sword Bit合體，變成大劍或大炮，好似變魔術咁款。MG版就統統做足，而且唔使換件，刀刃部分又用咗透明綠組件，夠晒Cyber Feel。至於GN Sword Bit又可以全數同左膊嘅GN Shield合體；GN Shield又可以擰去背脊，做到GN雙動力系統連結，重現劇中強勁嘅衝刺力。

擺甫士更自然

格鬥戰嘅機體，梗係要識擺大動作甫士，MG 00 QAN（T）以MG Gundam Exia嘅骨架為基礎，加入PG 00 Raiser模組設定嘅細節，幼臂、窄腰、粗腳等造型，忠實展現海老川先生嘅機設作風外，關節位仲有好高嘅活動能力，例如手腕關節可以斜向拉出，持劍直刺就更自然。而且心口係左中右三層式構造，加埋胸腹之間採用圓位組合而成，令上肢可以擺出更多細微動作。下盤設計同樣精彩，除咗膝頭有雙關節，髖關節仲可以上下調校，而且冇裙甲阻住，加個專用Stand，擺凌空甫士就更加型！

激死人唔包LED

00 QAN（T）另一項嘅醒目設計，就係太陽爐及全身關節位，都用咗透明綠嘅圓形組件，尤其是睇官圖，心口嘅太陽爐好似識發光，兼會泛起00Q嘅字樣，點知原來係美麗的誤會，實情係裏面貼咗銀色貼紙造成。雖然話另購專用嘅LED Parts就做到發光效果，弊在呢項另購服務只限日本，香港冇份，激死！如果真係想着燈，惟有用MG Gundam Exia嘅LED燈頂住先，或者做大手術幫00 QAN（T）改裝；最好都係拜託Bandai改變初衷，畀香港粉絲補購番啦！

雪崩接棒MG化？

今次嘅00 QAN（T），基本上用咗能天使高達（Gundam Exia）嘅骨架，基於Bandai「一雞幾味」嘅作風，《00》大系繼續MG嘅成數相當高，邊款機體會接棒呢？雖然廠方尚未表態，不過唔少粉絲都喺討論區表態，認為00 Rasier嘅機會最高，等呢三部主角機一家團聚！不過筆者覺得能天使雪崩型（Gundam Avalanche Exia）嘅可能性更高，事關之前已經出過兩款HG（1/144及1/100）經驗，模件分色都算唔錯，而且骨架同能天使近乎一模一樣，照計係最易MG化嘅00機體啦！

查詢：2433 1828

同場加映 Brave打孖上

唔只MG，今個月仲有兩部劇場版機體推出HG模型，就係可以變飛機嘅Brave「一般機」（即係卒仔用嘅量產機）同「指揮官專用試驗機」。唔好以為兩者一模一樣只係配色唔同，其實指揮官嘅頭部天線位比較尖，機背嘅太陽爐改用扁平設計，反而卒仔機個爐係尖o架！