林慧美×杜如風 單身女遊

《再單身遊記》曲終人未散，除了有同名香薰推出，「連戲」的家品亦湧現，累得不少姊妹「單拖遊」癮起，呢個又話要去峇里睇相，嗰個又話要去印度搵Guru，無非為自編自導一幕單身遊記，搵番自己同另一半！現實中的單身遊記又係咪一定有Happy Ending？兩位遊歷豐富的單身女遊人杜如風及林慧美，各有不同遊歷，各位想編單身遊行程的姊妹，係時候嚟攞番個出門小錦囊！

杜：杜如風

林：林慧美

Q：記者

Q1：請分享最難忘的一次單身遊。

杜： 有次單拖去曼谷，乘的士去唐人街食魚翅，發現衰格司機兜路，還不肯找贖。我大聲罵他之餘，更將身上所有零錢掟向司機塊臉！佢即時下車意圖追打我，好彩我閃得快咋，哈！

林： 去日本玩單身遊最安全，而且時常遇到超級好人。有次在知床JR車站的詢問處諮詢往二河谷底的方向，預備翌日前往，第二日出門前，服務員竟為我預備了一個便當，令我感動到眼濕濕。

Q2：在單身遊歷中有重大啟發嗎？

杜： 喺巴黎終於搵番我個星球！我成日畀人標籤為只懂享受生活的癲婆，但在巴黎周街都係同類。巴黎人在街頭亂畫畫、在Cafe搭訕又一日，Chill到不得了。其實做人應該係咁，要識得享受生活。

林： 當年在東京短住為租屋惆悵，在中央線阿佐谷站望住一片屋海，突然醒覺有機會在東京住幾個月已經好幸福，無謂強求，但不期望反而有收穫，不久便找到屋，可在東京Hea多一陣……

Q3：哪個國家適合玩單身遊？

杜： 梗係Hea爆嘅西班牙啦！當地食Lunch都食三個鐘，然後夜晚九點先開飯，食到凌晨又飲吓酒，呢種生活節奏好啱我。我嘅西班牙單身遊記目的地是馬德里同小島Ibiza，起碼玩足一個月先夠本。

林： 身為日本村姑，梗係叫你去日本玩單身遊啦！我最鍾意東京中央線高圓寺站打後的住宅區。唔Plan係我嘅Best Plan，朝早瞓醒想去邊就去邊。

Q4：對異地情有何看法？

杜： 最好唔好搞我！拍拖要投入感情同時間，我最反對即興的One Night Stand。見到異國型男睇吓咪算，當逛美術館，眼看手勿動。明知無將來，不如慳番啲時間行街買衫。

林： 雖然試過異地情緣，但後來發現無論旅居及旅行都有限期，好難開花結果。異地情只屬回憶，令旅程多一樣浪漫元素，有時睇唔清楚先最靚。文化差異係感情發展嘅最大障礙，加上我骨子裏始終係中國人，食唔慣西餐！

Q5：單身遊要注意咩事項？

杜： 雖然我唔當自己係女仔，但女仔單身遊梗係要注意個人安全，盡量避免單獨夜遊，不過日本太安全，我每次去東京都忍唔住夜蒲見識吓。

林： 我反而覺得心態最緊要，唔好用景點限制自己，亦唔好盡信朋友或網上推介景點。用心感受地方最緊要，用當地語言溝通固然好，有時用笨拙的身體語言溝通，反而為旅程留下有趣回憶。

Never Say Never

出乎意料之外，兩位單身女遊人一聽見異地情緣，立刻耍手兼擰頭，認為只屬Holiday Romance而沒有將來。大概是因為文化差異的關係，西方人素來今朝有酒今朝醉，《Eat Pray Love》作者Elizabeth Gilbert在書中提過，不少朋友花太多時間回憶過去，或憂慮將來，反而忽略了最重要的「當下」。Elizabeth的單身旅程本來為追尋自我及著書，最後竟在峇里認識了現任丈夫，一段單身旅程，結果湊成出書、再婚、著作拍成電影三贏局面，帶着Never Say Never的心態踏上旅途，結果更喜出望外。

林慧美 Profile

別號：日本村姑

年齡：30+

狀況：單身

職業：作家及電台節目主持

強項：煲湯、包糉及遊走日本鄉間

嗜好：睡覺及旅遊

＊勤瞓覺，懶寫嘢，可惜天意作弄，工作係寫嘢而唔係瞓覺……

菩薩照住

「好容易睇到靈異物體，為此經常失眠，有時驚到要去行家間房借宿一宵。雖然我沒有宗教信仰，但依家出Trip都會帶張觀音卡傍身，又真係幾靈噃，一直都幾順利。」

近期私藏：日式燒肉

「最鍾意嘅日本牛角燒肉專門店，終於喺11月底開到嚟香港！素來對日本料理連鎖店有信心，而且牛角燒肉價錢平民化，合理價錢已食到好好味嘅日式燒肉。」

杜如風 Profile

個人資料

別號：日本旅遊達人、新一代夠癲主持

年齡：20+

狀況：單身

職業：電視節目主持及節目製作人

強項：側手翻及爆肚對白

嗜好：購物、飲食及聊天

＊ 醫生證實本人患有精神病，但拒絕診治，繼續發癲

偉仔長伴我身邊

「除了阿媽封出門利是，我會夾偶像梁朝偉張相喺我護照套入面，飛到邊都帶埋佢去，我覺得佢張相有保護作用！」

近期私藏：平價「冷粉」

「近期最大收穫係Lanvin×H&M的Collection，為咗買呢批平價『冷粉』，我朝早5點已去到H&M，用10分鐘及2萬有找的價錢買了一堆『冷粉』。平時正牌『冷粉』一件索價數萬，依家一件只賣千零蚊，後悔無買多幾件！」