ViewPad 7 Crystal聽書

on.cc 東方互動主頁

小記身邊有好多朋友都鍾意睇小說，但買下買下唔經唔覺屋企就儲落大堆書，掉晒佢哋又覺得浪費，放响度又唔夠地方用。想環保啲不如買番部ViewPad 7，袋裝Size方便隨身攜帶，既可以當電子書，又可以處理文書工作同聽歌睇片，甚至做埋電話都得，難怪HotCha嘅Crystal試玩完都話要買番部。

咁多人睇好Tablet PC嘅前景，皆因佢可以將筆電同埋電子書功能二合為一，一機多用，可用來瀏覽網站，刨書睇片聽歌，見客時仲可以當Present工具，慳紙又環保！加上ViewPad 7售價比同級對手Samsung Galaxy Tab平一大截，雖然冇預載咁多專屬軟件，但係功能全面，已經帶畀大家無限驚喜。

打通中英文電子書庫

唔少人都嫌iPad太大部，帶出街勁唔方便，所以ViewPad 7跟Galaxy Tab一樣，都係採用7吋機身設計，袋裝Pocket Size更適合女生使用。至於成日書不離手嘅朋友，可以利用Aldiko電子書閱讀器下載新書睇，除咗有多本免費電子書可供下載外，仲會定期將暢銷書推介畀大家；若嫌英文書唔夠親切的話，經Aldiko都可以去到Dooland呢個內地中文電子書網站，裏面搜羅咗多本內地嘅知名雜誌，提供更多元化嘅閱讀口味。

鏡面銀邊似iPhone 4

ViewPad 7機身採用黑色鏡面設計，配合銀色金屬邊框，造型簡約唔浮誇，設計簡單得來，又有幾分iPhone 4 Feel，相信用家都會受落。雖然佢都可以用來打電話，但咁大部拎住傾都有啲辛苦同異相，所以小記建議都係另購線控或藍芽Handsfree。另外，機身左右兩邊各有一個喇叭，橫放睇片時聲量夠晒大，而且打開保護蓋就能夠更換SIM卡同Micro SD卡，方便過唔少電話。除咗機面有個前置鏡頭可以進行視像通話外，機背中央位置亦設有一個300萬像素相機鏡頭，用家可以篤芒拍攝，若果有埋補光燈同自拍鏡就更加好。

Android 2.2 Apps任玩

此外，佢仲內置咗轉向感應，打直時可以當電子書睇，打橫則可以用來上網、睇片，甚至變成座枱電子相架，雖然只配搭Qualcomm 600MHz處理器，但換上最新嘅Android 2.2平台後，篤芒反應非常流暢，開App上網都唔使點等。縱使ViewSonic冇特意幫ViewPad 7開發專屬應用軟件，不過系統已預載Gmail、Google Maps等Google服務，仲有埋繁體中文介面，新手都識用，同時用家可以從Android Market下載大量新Apps，唔怕冇嘢玩。