得閒圍脖

Sammie：

仲記得讀書時期已經鍾意容祖兒，因為佢唱歌真係好聽，佢嘅演唱會我都睇咗幾次，今年Joey再開Concert我亦被吸引入場。雖然佢嘅演唱會驚喜唔算多，但今年都見到啲唔同地方，好似Joey特別用一年時間練習結他，都博到大家歡心。自己最鍾意係佢將快歌《愈唱愈強》變咗做慢板，感覺好新鮮，睇得出佢嘅用心。當然最開心係可以現場再聽到佢唱《煙霞》，呢首歌當日一聽已經好鍾意，大家都不妨細聽！

Jackie：

最近天氣好啱行山，早前與友人選擇到港島孖崗山一遊，親近大自然為名，一嘗「港島豪宅在我腳下」嘅虛榮為實。孖崗山有個媲美新豪宅盤的英文名「The Twins」，沿途可以欣賞到港島南區如淺水灣、赤柱、舂坎角及遠眺將軍澳風景，海天一色大概如此。不過要由南崗行至北崗，就需要有足夠嘅腳骨力行上800多級的「天梯」，皆因梯級均有番咁上下「厚」度。不過，上到山崗的確係身心舒暢，落山時又有餘暉相伴，頓覺心靈滿足！

Rachel：

好像自從大學畢業之後都沒有看過中長篇小說，最近因為同事J執屋時找到余華的《兄弟》，說可以借給我看，我就梗係老實不客氣啦！這本書應該很多人看過了。不過，我自己比較喜歡書的上半部，看完上半部我還擅自將書借給媽媽看，借了之後就後悔，因為她又犯了老毛病，一打開書就開始自己唸起來，我說：「我看過了，不用唸。」她才靜靜坐在梳化的左邊看上半部，我就坐在右邊看下半部，感覺挺有趣。

P.S.坐在對面的同事J說要我特別鳴謝她……