天王熱捧 $360爽爆響螺片

郭富城、張學友、黎明、關之琳、劉青雲、劉嘉玲……都有個共通點，係咩？佢哋都係藝人囉。錯！答案係佢哋都係「尚興潮州海鮮飯店」的忠實粉絲。這間名人食竇，凍蟹、滷水鵝出晒名，其中索價近$400一片的響螺片，更是有錢都食唔到，皆因來貨少又不穩定外，還因一隻重兩斤多的鮮響螺，最脆口幼嫩的部分只可片出3至4片來，貴得有道理。

在50多年之前，有間火鍋店出名用料靚，吸引不少肯花錢又識食的人幫襯。由於老闆是潮州人，偶爾會炮製一些潮式家常菜、炒粉麵等奉客，慢慢地店子由火鍋店變成了潮州飯店，那就是由數十元一個小炒到數千元的大鮑翅都有供應的「尚興潮州海鮮飯店」。

半世紀滷水　每日翻煮

據飯店的第二代傳人強哥表示，曾惠顧的名人、明星多不勝數，像周星馳就曾經視尚興為飯堂，試過連續14日在這裏吃飯，除了柯打凍蟹、大鮑翅這些招牌菜外，最愛吃的就是滷水鵝。提起滷水鵝，強哥十分自豪，因為尚興的滷水汁已有逾50年歷史，幾十年來，每天都會煮滾一次，半個人咁高的鐵桶裏，盛着大半桶滷水汁，每次開火煮滾至少要花個多小時。為了保持滷水汁濃郁又不失鮮味，每次開火前都要放入適量的玫瑰露、粗鹽及豉油；花椒、八角、果皮、桂皮、川椒、薑、白胡椒等滷水料則要每星期更換。至於主角來自汕頭的獅頭鵝，用的雖然是冰鮮貨，但強哥一樣精挑細選，每隻鵝重11至12斤，肉多又不會有太多肥膏。強哥仲話要鵝肉好食，除了滷水汁之外，清洗鵝隻的步驟亦很重要，必須內外用清水徹底洗淨再去血水，如此便不會影響鵝肉及滷水的味道了。

貴價響螺　一隻得四片

除了滷水鵝，這裏的白灼螺片一直高踞人氣榜首位。每次都親自挑選響螺的強哥表示，他們用的是南中國海域一帶的鮮活貨色，若要螺肉夠嫩夠爽脆，最好選重2斤半的，而平均每1斤約只得2両肉可用。以目前響螺的時價每斤約$500計算，一隻連殼的活口響螺單是來貨便要$1,300左右，以一隻有4片來計，每片的成本價便超過$300。不過雖則價錢貴，但一樣有唔少人捨得食，天王郭富城、張學友及黎明便是捧場客。將薄薄的一片，放入滾水中輕輕一灼，入口即可嘗到鮮、嫩、脆、甜的滋味。強哥又說：「我對海鮮的要求十分高，有時若果貨不對辦，我情願賺少點，叫客人下次再食過，以凍蟹為例，一定要用約3斤重的大花蟹，每隻我都會親自挑選，確保蟹肉紮實，唔靚的一定不會上枱。」如此堅持，難怪尚興至今依然客似雲來，成為名人、明星的必吃飯堂。

查詢：2854 4557