《Assassin's Creed Brotherhood》兄弟幫開殺戒

眼見去年差唔多時候推出嘅《Assassin's Creed 2》咁受歡迎，新作《Assassin's Creed Brotherhood》（簡稱《ACB》）再度由上集成功躋身刺客大師嘅Ezio孭飛。《ACB》仲首次加入連線玩法，約埋幾個兄弟上網互片都得，幾有吸引力！

今集《ACB》除咗唔使重新訓練主角，一嚟就入肉執行任務外，仲加入「收o靚」制度，亦即係遊戲副題嘅「兄弟幫」，畀人圍時都可以Call班「兄弟」出嚟幫手，做殺手都唔再孤獨啦！

收o靚幫拖打天下

其實大家都可以將《ACB》當成《AC2》嘅續集，故事延續自上集Ezio成為刺客大師後，再次展開與聖殿騎士團嘅戰鬥，前往羅馬剷除邪惡勢力。事隔一年，新一集在多方面都加入新點子，其中最出位要算係加入「收o靚」制度，可以在遊戲過程中招攬其他年輕刺客做「兄弟」，平時可安排佢哋潛伏在城市蒐集情報，有需要時只要打出一個手勢，就可叫佢哋出嚟幫手，就算被人包圍都可以迅速逆轉場面。雖然唔使供養呢班「兄弟」，但作為大佬，安排佢哋執行邊項任務都要考慮佢哋嘅能力，一個唔小心被殺就唔識翻生。

打機認識歐洲史

遊戲背景繼續設定在文藝復興時期嘅意大利，仲有唔少歷史人物客串，除咗上集已經出場嘅達文西（Leonardo Da Vinci）外，今次仲有《君王論》作者馬基亞維利（Niccolo Machiavelli）登場，而PS3版更會加送以當年提出「日心說」的天文學家哥白尼（Nicolaus Copernicus）為重心的特別任務，等大家從PSN上免費下載，順道了解一下歐洲歷史。

騎馬飛天跳降傘

主角在《AC2》時已經用過達文西設計的飛行器執行任務，今集想當然會有更多新武器上場，除袖中槍、降落傘外，飛行器亦經過改裝，仲有機會走上城牆上嘅炮台發炮攻擊圍城嘅敵軍，玩法幾有新意。今集還可以畀大家騎馬加快移動速度，不過要在城內窄巷策馬狂奔都不太容易，但點都比在建築物上跳來跳去較有效率。

八人連線玩暗殺

雖然要完成《ACB》單人模式，睇怕都要花15個小時以上，但始終連線玩法先可以長煲長有，所以今集就追加多人連線模式，可由四至八人上網互片。連線打《ACB》當然唔止得主角Ezio可揀，仲有男女小丑、走私者同官員等眾多會在街頭出現嘅角色，很易就混入人群中避開其他玩家追捕刺殺；而且每個角色都有獨家武器及獨有暗殺技能，更有互相制衡嘅作用，冇人特別屈機，所以行街時小心被人做低。

比普通版貴$100以上的《ACB》收藏版，除用上鐵盒包裝外，亦加送8款印有遊戲角色的杯墊，都幾有紀念性。

遊戲檔案

類型：動作

開發：Ubisoft

平台：PS3、Xbox 360

推出日期：今天（11月18日）

售價：

$389（PS3普通版）

$498（PS3收藏版）

$359（Xbox 360普通版）

$478（Xbox 360收藏版）

查詢：2359 7998