重溫70後經典遊戲

雖然紅白機、超任等遊戲機只得起格嘅2D畫面，音效仲同依家啲家用機差大一截，不過細個時跟老友記「打生打死」嘅日子確係令人懷念。最近老牌遊戲廠商都玩Vintage，將部分經典遊戲移植到iPhone，幾蚊美金就可以玩番《食鬼》、《街霸II》等長青大作，幾時都可以重拾童年回憶！

連Goolge都決定永久保留《食鬼》網頁（www.google.com/pacman），就知道經典遊戲仍然有大把Fans支持，所以廠商們都趁機在iPhone上推出復刻版，仲保留埋原作嘅操作方式。

《PAC-MAN Lite》食足30年

下載費用：免費

1980年推出嘅《食鬼》原本係一隻街機遊戲，因推出後大受歡迎而被移植到不同遊戲平台。玩家要控制黃色嘅食鬼食晒迷宮入面嘅點點，期間仲要避開四隻紅、橙、粉紅、藍色嘅鬼仔，點樣善用迷宮內嘅「大力丸」更係致勝關鍵。

下載費用：$2.99美元

經典賽車遊戲《Pole Position》於1982年推出，喺當時嚟講算係非常真實嘅賽車遊戲，歡迎度拍得住依家啲大作。除咗格蘭披治賽外，仲有單人、突然死亡模式畀你慢慢玩，大家揸車時仲可以留意下賽道兩旁嘅廣告，據講就係由佢開創咗電子遊戲廣告嘅先河。

下載費用：$5.99美元

遊戲主角Sonic創立於1990年，玩家要控制超音鼠跳起避開敵人，或者加速撞埋去KO對手。邊打邊走嘅過程中，記得要盡量收集光環，因為每畀敵人攻擊一次就會扣減身上嘅光環，扣到無晒又畀人打中就Game Over！

下載費用：免費

呢隻由Capcom推出嘅App，包含4隻經典遊戲，包括《街霸II》、《1942》等重量級大作，雖然iPhone版嘅虛擬Joystick操控上差少少，不過出招幾容易，唔使Chok到手指甩晒皮！

下載費用：$0.99美元

俄羅斯方塊呢隻長青遊戲，已經有近26年歷史，唔講唔知，原來佢真係由一名前蘇聯科學家編寫。iPhone版本就改以觸感取代傳統十字方向桿，一隻手指就可以做晒轉換方向、拉落等指令，相當方便！

下載費用：$4.99美元

於1978年推出嘅《SPACE INVADERS》，算得上係第一代射擊遊戲。玩家要喺怪獸降落地面之前將佢哋消滅。iPhone版連介面都跟足街機，畫面有黑邊加上黑色Joystick同Sharp爆紅色大掣，落機舖打機嘅感覺即時番晒嚟！