橫直鍵盤玩微博Lenovo P90w

on.cc 東方互動主頁

摺機係昔日手機主流，但由於輸入文字唔方便，所以自從QWERTY鍵盤冒起後，其地位已被側滑甚至觸屏款式迅速取代。Lenovo新機P90w同樣採用摺合設計，但卻沒有輸入不便的問題，事關屏幕打橫揭開後，傳統數字鍵就會轉化成QWERTY鍵盤，配合內置嘅微博快捷鍵，保證可以極速「搶梳化」！

雖然QWERTY鍵盤不算特別，但由於手機空間有限，很多時會以兩個形式出現︰一是採用側滑式設計，將整組鍵盤收納於滑蓋下；二是在觸屏上建構虛擬鍵盤，待有需要時才開啟出來。然而前者會令手機厚度大幅增加，後者又會增加誤觸機會，直至Lenovo P90w的推出，才發現原來QWERTY可以另一種方式出現。

10萬次開合測試

外形方面，Lenovo P90w跟一般摺機無異，金屬髮絲外殼配以銀色邊框，專業得來亦甚有和風味道。不過內部結構卻承襲了ThinkPad的防滾架技術，即設有大面積固定架，當手機遇到撞擊時會將壓力分散，從而減低損壞。另外，一如日系機愛玩變形，呢方面佢亦學到足，屏幕除可向上翻起外，在「2-way雙轉軸」結構幫助下，屏幕還可打橫揭開，令手機變成座枱模式，睇片時自然可翹埋雙手。官方更表示出廠前經過10萬多次開合測試，保證鉸位實淨堅固，再手多都唔怕整壞手機。

首創雙鍵盤形態

屏幕除了可雙向揭開外，P90w另一賣點係設有兩種輸入方式；簡單而言，就係鍵盤會因應屏幕的開合方向，而自動切換成不同用途。例如屏幕垂直揭起時，鍵盤會如傳統數字鍵般，每個按鍵均代表數字及三個英文字；但當橫揭屏幕時，鍵盤就會變成QWERTY樣式，此時英文字母獨立成鍵，更方便喪打SMS。為避免表面的字碼過於混亂，背燈只會在QWERTY形態時亮起，設計夠晒細心！

一按即時上微博

打字快咗，上網亦爽過其他國產機，皆因它既支援GSM雙頻，亦對應3G制式，數據下載速度達3.6Mbps，自然比行GPRS有效率得多。另一方面，它的網絡服務亦較以往的Lenovo手機完善，除提供Twitter及新浪新聞的快捷鍵外，還預載了QQ及新浪微博，按一個掣就可結交內地好友或「關注」明星動向，方便！嫌QQ唔夠國際化﹖唔緊要，手機還內置了Nimbuzz通訊程式，一站式管理Facebook、Google Talk及MSN等社交帳戶，傾偈唔使逐個程式切換，就算朋友多多都唔使煩啦！