好玩RZ10 10倍Zoom似玩具

小記自細就好鍾意逛玩具及文具店，因為那裏五顏六色的產品特別吸引，而今次Pentax這部最新推出的RZ10，亦帶來相同的感覺，不單止有檸檬綠、亮麗紫等顏色鮮艷的機身，而且外形似足玩具，加上數碼濾鏡和10倍光學變焦功能，真係好玩又得意。

外形上RZ10就好像從前的傻瓜相機，簡單一個長方形加上凸出的手柄和厚厚的機身，感覺似玩具，拎上手卻又比小記預期輕巧，加上鮮明的用色，感覺相當繽紛好玩，其實RZ10擁有10倍變焦鏡頭，以二千元有找的價錢而言，的確抵玩。

模式介面色彩繽紛

此機不單止外形似玩具，連操作介面都帶有幾分玩具嘅可愛，其色彩繽紛的模式選擇介面，裏面的每個圖示都用上相應的色調，例如新增的藍天模式圖案以粉藍色設計，黃昏模式又用上紅色黃色，唔似一般相機非黑即白咁沉悶。拍攝方面，用家只要開啟機內的超微距模式，即使係扭蛋模型咁細的小玩具或景品，都能拍得一清二晰，睇相時又設有柔焦、魚眼、星光等數碼濾鏡，為相片加入黑角及偏色的玩具相機特效，好睇又好玩。不過機背的按鈕略嫌細小難按一點，還有變焦桿的位置亦改放於機背，起初使用時會有點不習慣。

認住寵物無走漏眼

除微距拍攝外，身為10倍小炮的RZ10，支援最遠280mm的遠端拍攝，能覆蓋常用的拍攝焦段，加上內置防震系統，離遠Zoom埋去都怕手震影到鬆郁朦。雖然相機沒有加入光圈先決、快門先決等手動設定模式，缺少了一份專業的感覺，但就提供了8種全新的場景模式，好似郊遊時影風景就可以使用風景模式、黃昏拍攝時又可以改用日落模式，唔使考慮光圈快門感光度的設定，揀啱模式就影到靚相，相信更啱喜歡簡簡單單唔想煩的影友。較特別的是RZ10仲支援埋寵物辨識功能，用家可以預先拍低寵物的樣貌並於機內進行登記，相機以後就識得追住佢來影，咁就唔怕會「走失」。

機檔案

感　光　元　件：1,400萬像素

1/2.33吋CCD

焦　　　距：28-280mm（10倍光學變焦）

最　大　光　圈：f/3.2-f/5.9

顯　示　屏：2.7吋23萬像素

影　片　質　素：1,280×720

最高感光度：ISO 6,400

體　　　積：97×61×33mm

重　　　量：157g

查詢：2926 2300