幾蚊雞酒店餐具

為新潮煮婦，屋企啲碗碗碟碟當然要又靚又齊全！專售酒店及餐飲設備嘅「依貴雅」聽日開倉，畀大家用平民價買高檔餐具，自問精打細算嘅姊妹們咪錯過囉！

我叻太最怕悶，屋企啲碗碟見得多都會厭，所以不時都會買定啲新嘢備用，得閒可以換吓口味。平時同老公去酒店食飯，都好想將啲靚餐具據為己有，不過自己買就一定好貴，但終於畀我等到用平民價買到五星級酒店嘅產品喎！講緊依貴雅一年一度嘅清倉大減價，兩日減價期間會出售多款五星級酒店使用嘅產品，包括碗、碟、蛋糕架、酒杯等，真係用「蔗渣咁嘅價錢，食到燒鵝嘅味道」，睇嚟又係時候買定啲送禮自用，為搜羅聖誕禮物做好準備。

開倉詳情

日期：11月12至13日　　　

時間：10:00am至5:00pm

地址：尖沙咀亞士厘道九龍中心9樓　　　

查詢：2838 8989

幫薑餅扮靚靚

我出得廳堂、入得廚房，不過一講到屋企玩親子煮飯仔就怕怕！為咗滿足叻仔成為廚神嘅欲望，呢個Weekend我會帶佢去蘭桂坊，聽講嗰度會有嘉年華會，其中「玩具反斗城兒童街」將舉辦《靚靚薑餅裝飾工作坊》，畀班細路一顯身手！只要捐$50畀「關懷愛滋」就可以參加，利用各種材料同無限創意，裝飾屬於自己獨一無二嘅薑餅。有得食、有得玩，仲做埋善事，真係一舉多得。

【靚靚薑餅裝飾工作坊】

日期：11月13至14日

時間：2:00pm至5:00pm

　　　（每節45分鐘）

地點：中環蘭桂坊和安里

　　　8至13號1樓

查詢：2991 6222

冬天保暖泳衣

平時一得閒就跟住爸爸去游水，不過佢話天氣轉涼容易冷親，唔畀我去喎！好在媽媽夠細心，買咗Arena新出嘅小童保暖泳衣畀我，連身款式領口密實，唔驚凍親頸仔，除咗保暖外，仲有防曬功能。有咗佢，我就可以同爸爸去游冬泳啦！

查詢：2265 7992

關心低碳發展

低碳發展咁Hit，點可以唔識？最近行過書局，見到新書《世界低碳發展的中國主張》，一睇個作者係中國著名經濟學家樊綱就知係好嘢！書中內容以中國在哥本哈根國際會議嘅主張為藍本，仲收錄咗中國經濟學者多年來與瑞典斯德哥爾摩國際環境研究院合作嘅有關研究，同時亦在書中提出「國家間協作減排計劃」（ICP），極具參考價值。我咁關心時事，梗係買本返屋企慢慢研究啦！

作　者：樊綱

出版社：商務

售　價：$88