Nokia X3-02 糖兄妹 玩得肉緊

一個Man爆結他手糖兄，一個Cute到暈主音糖妹，兩個形象南轅北轍，究竟一部X3-02點樣俘虜佢哋嘅心？原來糖妹就係鍾意X3-02顏色夠搶眼，尤其係桃紅色，就最Kawaii，啱晒佢形象咁話；而大大隻嘅糖兄就讚部機夠薄，手感一流，最重要係$1,698非常抵玩！

智能手機係就係支援度高，而且仲有幾十萬個Apps任你單撈，不過對於想簡簡單單搵部平實電話嘅朋友嚟講其實未必啱用。Nokia剛剛推出新機X3-02，外形大玩返璞歸真，但唔好以為又係一款平價但功能一般嘅入門機，查實佢備有觸控大芒加鍵盤，反應快之餘，仲有黑白藍紫桃紅五種顏色，連糖兄妹都大讚勁掂！

直身篤芒 按鍵手感佳

內置QWERTY鍵盤嘅篤芒手機，打字快之餘，又可以玩埋觸控，其實都幾方便，不過，小記自問懶得就懶，嫌推個QWERTY鍵盤出嚟都太麻煩，咁呢部直身設計嘅X3-02就啱晒。X3-02驟眼睇同一部舊款N記手機差不多，加上超平嘅定價，難免會令人誤解佢係一部功能普通嘅入門機。機身設有一個反應靈敏嘅2.4吋電阻式屏幕，雖然尺寸唔及閒閒哋3、4吋嘅大芒手機，不過勝在屏幕下方有一個實體數字鍵盤，唔想手寫時，又可以直接用數字鍵輸入，仲支援埋香港字，SMS就更傳神啦！

一按播歌 焚機都得

X3-02機身僅9.6mm，而且只得78g重，相比起iPhone 4真係纖薄輕細得多，袋落褲袋就唔怕頂住大髀！雖然體積大瘦身，但機能絕無縮水，內置500萬像素鏡頭，只是拍攝介面相對比較簡單，而且不設補光燈，不過日光下，表現尚可接受。另外，機身亦設有音樂、短訊兩個快捷鍵，一按畫面即出現音樂播放介面，喇叭仲好夠聲添，用嚟焚機都得！

無線上網 Apps任裝

一般平價機都唔支援Wi-Fi，大家逼住要上台用貴Plan，極之唔划算！不過X3-02就體貼得多，支援Wi-Fi 802.11n，到大型商場或快餐店嘅免費Hotspot就可以上網。另外，手機亦支援10.2Mbps HSDPA，加上內置Facebook、Twitter兩大社交網站軟件，隨時更新好友近況，而且Ovi Store仲有大把唔同類型嘅Apps畀你單撈，吃喝玩樂都咁啱玩！

機檔案

制　　式︰ GSM四頻、WCDMA 850 / 900 / 1900 / 2100

操作介面︰ S40 6th Edition

屏　　幕︰ 2.4吋電阻式觸控屏幕，240×320解像度

鏡　　頭︰ 500萬像素

記　憶　體︰ 31MB內置記憶體、支援最高32GB microSD記憶卡

對外連接︰ 藍芽2.1、Wi-Fi 802.11 b/g/n、HSDPA 10.2Mbps

通話時間︰ 3.5小時（3G）

5.3小時（2G）

備用時間︰390小時（3G）

430小時（2G）

體　　積︰ 106.2×48.4×9.6mm

重　　量︰ 78g

查　　詢︰ 2136 6338

Sugar Club Wants to Share ：去台灣錄音出大碟

「之前我哋出咗隻『糖兄妹台灣寫真EP Love Memory』，仲打算喺11月尾推出首張大碟，今次公司安排咗我哋同唔少台灣著名音樂人和監製合作，例如有馬念先老師、金木義則老師，更有機會到台灣進行錄音，簡直又驚又喜！希望大家聽完之後會好似我哋嘅組合名稱一樣：甜蜜蜜！」

I Read： 未雨綢繆唔使煩

「近排睇緊一本書叫《怕麻煩的背後有金礦》，呢本書係我去台灣時買嘅。作者想提醒大家，如果想為生活減少麻煩，就應該從生活細節入手，先第一時間解決小麻煩，甚至未雨綢繆，避免自己捲入大麻煩之中。」

I Eat ：福建炒飯夠環保

「我最鍾意食福建炒飯，因為福建炒飯會炒底，而且仲係用隔夜冷飯，同埋餸頭、餸尾炒埋一碟，咁就唔使嘥咗食剩嘅飯餸，夠晒環保！」

I Sing： 新歌幫地球打打氣

「其實日常生活中，大家都可以對環保出一分力，例如少用膠袋、將廢紙分類，或者少開冷氣，這些事情都是我們能力可以做到的，所以遲啲首新歌《地球應援團》，希望大家一齊為地球打打氣！」