蜜蜜飲

上星期六帶咗叻仔去蜂蜜場參觀，蜂場負責人葉生教我哋點樣揀靚蜂蜜﹗我當然唔執輸，買咗成箱蜜糖返屋企Stand-by，得閒沖番杯靚蜜糖水飲吓，同乾燥Say Bye﹗

大清早就去咗沙田排頭村山上嘅永和蜂場，同幾千隻蜜蜂近距離接觸，今次真係大開眼界！依家市面上嘅蜂蜜種類多到數唔晒，我哋班師奶朋友都唔識揀，難得去到蜜蜂場呢個寶地，梗係趁機請教吓專家！

葉生話：「一年四季都有蜂蜜出產，唔同季節嘅蜂蜜，味道跟效用都有分別，最靚嘅蜂蜜係產於冬至時期。因為蜜蜂會採集鴨腳木跟野桂花嘅花粉釀成花蜜，呢個時期嘅蜜糖最有花香味，味道濃郁，可以話係『上品』」。囝囝上網查過資料，原來鴨腳木係嶺南冬季特有，能清熱解毒、祛風除濕，特別有助咽喉腫痛、風濕關節痛人士，果然係蜜王！

至於春夏季，蜜蜂就會採集龍眼、荔枝等嘅花粉，蜜味比較淡，不過依然有清熱解毒、調和腸胃等多種功效，最啱生活繁忙嘅都市人飲用。

延伸蜜品

原來蜜蜂場唔止得新鮮蜂蜜，仲有其他嘅蜂蜜製品，蜂巢素係用老蜂巢精華加上蜂蜜釀製而成，有補中益氣之效。至於花粉可增強人體免疫功能、促進睡眠，亦可恢復皮膚彈性和光澤，而且花粉內嘅卵磷脂可燃燒過剩嘅脂肪，有效減肥，不過記住花粉不可以跟珍珠粉一齊食。

蜜味滋補

想用蜂蜜滋補都要飲得其法，所以我一早就請教咗個fd千草醫藥坊譚莉英中醫師，介紹幾個食用療方畀我喇！

桂花雪梨蜜飲（1人分量）

材料：雪梨1個，蜂蜜1湯匙，桂花1茶匙。

做法：雪梨切成薄片或小粒備用，用熱水250ml將桂花沖焗出香味，待水微溫時加入蜜糖，蜜糖完全溶解後加入雪梨即可飲用。

功效：消炎潤肺、祛痰止咳。

蜜糖銀花露（1人分量）

材料：金銀花30克、蜂蜜30克。

做法：於瓦鍋中加入金銀花及水500ml，大火煮沸後，取汁去渣，待水微溫時加入蜂蜜調勻即可。

功效：預防結核病及流感。

蜂蜜首烏丹參（2人分量）

材料： 製首烏、丹參各3錢，蜂蜜3湯匙。

做法： 準備瓦鍋，加入製首烏、丹參及水400ml，大火煮沸後轉小火煮20分鐘，取汁去渣，待水微溫時調入蜂蜜。

功效： 首烏可補肝腎，丹參有活血化瘀之效。適用於動脈硬化及高血壓者。

查詢：2691 7917

至Bling iPhone Case

無可否認，iPhone依然大熱，人人都梗有一部在手，連iPhone套都成為熱賣系列。最近見到好姊妹換咗個Bling Bling iPhone套，簡直係閃爆鏡。原來係Che Che新出嘅立體動物系列，有好多款選擇，全部都用珠片釘製，夠晒華麗！我都忍唔住買咗兩個，繼續緊貼潮流！

查詢：2882 2979