慢郵未來

個個都當我係豆丁，我真係好想快啲大個仔，唔知20年後嘅我會係點呢？一於寫封信畀20年後嘅自己，同佢Say個Hi先！

我啱啱學識寫字，先發覺原來冇乜機會寫嘢，因為依家上網、MSN、SMS都唔使用手寫，但係媽咪話佢細個會成日寫信畀朋友，收到人哋嘅信又會好滿足，同收到SMS嘅感受好唔同喎，我都好想感受一下呀！

咁啱又畀我知道旺角兆萬中心最近開咗「時光漫郵Postmoment藝術遊局」，概念就好似內地嘅「慢遞」服務，可以响你預定嘅日子將信寄到收信人手中，寄信預設日期可以係1個月、1年、5年，最長仲可以去到50年添！店主之一嘅Iris話，開咗2個月左右，已經儲存咗接近300封信，好多都係學生同OL，有啲寄畀同學仔、男朋友，亦有媽咪寄畀長大後嘅仔女。

但係啲信會點儲存呢？時間咁耐，點確保到時一定寄到收信人手上？Iris話：「所有信件會放响銀行保險箱，寄信資料都會入落Database，按照預定日期寄出，寄去海外都得，好多人都問：『如果你哋執笠咁點算呀？』我可以話畀大家聽，呢個係我哋對大家嘅承諾，即使我哋改咗地址，或者關門大吉；我哋都會兌現承諾，將信件响預設日期寄出，同埋可以隨時叫我哋更改郵寄地址。不過，我哋唔鼓勵寄信者拎番封信，因為信件係記錄當下心情，我哋唔希望寄信人隨意收回呢個承諾。」

「慢遞」源自北京

慢遞服務最初响北京興起，源於有幾個後生仔响798藝術區成立「由正慢遞」公司，讓大家透過「寫信給未來」嘅服務，記低當下嘅心情同夢想，信件可以响指定時間送到收件人手上，最長可以去到2046年，開業至今已經收到約2萬封信。

收費：每封信第一年內$12，每增加一年加$2。另加郵票費，亦可寄往香港以外嘅地方。

查詢：3480 3329

網址：www.postmoment.com

叻生：潤膚冇甩拖

我哋班佬平時最鍾意約埋一齊行山，呢排天氣涼，行得仲頻密咗添﹗不過，我哋粗枝大葉，好容易整親，又唔識護理，好彩老婆最近買咗支VitaMan木瓜皮膚修護乳霜畀我，有天然抗菌功效，仲可以修護細微傷口，或者因為運動、戶外工作而造成嘅損傷。响秋冬時節，膝頭同手肘容易粗糙爆坼，呢支乳霜啱晒我！

查詢：3485 7432

叻太：爆笑戀愛故事

結咗婚咁多年，成日都想同老公重溫以前拍拖嘅感覺，最近朋友Daisy介紹咗新書《等待真實的戀愛》畀我睇，係一個80後嘅年輕作家寫嘅愛情小說。故事講述兩個高中生小琪同小羅，兩個人喺網上遊戲中萌生愛意，由認識、戀愛，到了解何謂拍拖，甚至愛到不能自拔；响分開嘅限期前，佢哋珍惜每次約會，限期過後，小琪為咗愛情，更鼓起勇氣做咗一件從未做過嘅事。作者文字到肉，而且加插爆笑漫畫，簡簡單單，啱晒我重拾少女情懷喎！

《等待真實的戀愛》

作　者：JoeyJohnny

定　價：$50

出版社：尚龍出版

叻仔：我係咪資優兒童？

有時聽到同學仔啲媽咪傾偈，個個都講到自己個仔個女好叻，其實係咪真係咁多資優兒童？計我話與其自己呃自己，不如聽吓啲專家講仲好啦！伯樂音樂學院舉辦「我的孩子是資優兒童嗎？」講座，到時會有教育心理學家教大家點樣識別資優兒童，同埋家長可以點栽培，出席講座嘅仲可以免費試讀Little Green Music課程一堂添！

日期：11月17日

時間：7:30pm至8:30pm

地點：伯樂音樂學院

費用：免費

查詢：2980 3668