《Sonic Free Riders》　踩虛擬滑板執金幣

Kinect for Xbox 360今日搶先在美國推出，對應Kinect的新Game都會陸續登場。除咗Microsoft自家製的Kinect遊戲外，由第三廠商推出的遊戲其實都好有睇頭，好似一向大賣速度感的《Sonic》超音鼠都會第一時間現身Kinect。新作《Sonic Free Riders》要大家踩地加速之餘，仲要扭腰轉向執金幣，畀晒機會玩家體驗遊戲的速度感！

其實Sega在三、四年前推出過一套由Sonic領軍，踩滑板鬥快嘅遊戲《Sonic Riders》，今次呢套Kinect版《Sonic Free Riders》就係續集，但特別在要玩家踩上被稱為Extreme Gear的飛行滑板上鬥快執金幣。

先學踩板三式

Kinect標榜唔需要任何控制器操作，所以玩《Sonic Free Riders》都唔會見到好似Wii平衡板的板狀控制器，只需要側身用一邊膊頭對住Kinect鏡頭就可操控虛擬飛行滑板。遊戲的基本操作唔算太複雜，只需要學識加速、轉向同執金幣三個動作就夠玩。加速動作係將離鏡頭較遠的那隻腳提前，然後向後一撐就得，跟正式踩板冇乜分別；而轉向方式其實亦跟真實環境相同，將身體向前或向後傾鈄就能轉向，甚至可做出跳起180°轉向嘅動作。

道具招式多籮籮

至於執金幣更係《Sonic》遊戲的指定動作，但點樣先能執到金幣？答案係伸手去執就得。因為Kinect系統可以感應到手部動作，伸手時遊戲角色會即時在畫面上反映出來，操作簡單直接。《Sonic Free Riders》遊戲速度感已經好強，單係加速同轉向都好容易玩到腳痹兼腰骨痛，但係遊戲仲加入道具系統，可以在賽道上執起各種道具進行攻擊，譬如可以用上投或下投方式掟出炸彈，使出流星錘時又要Shake來Shake去，甚至可以學打高爾球咁擊出道具攻擊前面的玩家，攻擊招式多籮籮！

合體接力要同步

《Sonic Free Riders》嘅雙人模式都做得幾特別，除咗一般兩人分割畫面鬥快鬥出招外，遊戲仲加入埋Tag Race新玩法，兩位玩家可以面對面手拖手黐埋玩「合體」，做出Synchro Play同步動作，如夾啱Timing齊齊跳玩花式，或扭身扭勢轉急彎，不過睇嚟都係較啱情侶玩多啲。雖然遊戲同一時間只容許兩位玩家落場玩，但只要進入到接力區時換人，就可以支援到四人對賽，都幾睇玩家嘅合拍度，但點都比以往用手掣玩有趣得多！

遊戲檔案

類　　型：體感動作

開　　發：Sega

平　　台：Kinect for Xbox 360

推出日期：11月20日

售　　價：$328

查詢：2620 6667