Nikon P7000自訂焦距快過換鏡

on.cc 東方互動主頁

唔少人貪方便都鍾意購買焦距範圍大的數碼相機，方便一機走天涯，不過實際上用來用去都係嗰幾個焦段，所以Nikon P7000就增設了變焦記憶功能，讓用家將常用焦距儲存下來，遇啱適合的拍攝題材時，按個掣就可以即時切換，快過換鏡多多聲。

雖然P7000仍舊使用千萬像素CCD，解像度並冇提高，但鏡頭方面採用28mm起跳的7.1倍光學變焦鏡頭，囊括生活上最常用到的焦距，最重要係手動設定多，喜歡點影就點影，加上虛擬水平線功能，相片有冇傾斜一睇就知。

周身轆切換就手

唔知大家有冇發覺，好多部旗艦級DC嘅體形都有番咁上下，佢哋之所以咁大部全因要方便用家操作，好似Nikon今次部P7000就周身轆，機身上下左右都放置了幾個轉盤，除了模式轉盤外，還有曝光補償轉盤，不論用家使用甚麼模式都可以即時調校曝光值，例如覺得畫面太光的話，可以將轉盤向左轉調校至-1級即可，方便快捷，小記個人就相當喜歡。另一個設於機頂右邊的快速選單轉盤，提供白平衡、感光度、自動包圍等等設定，唔使進入拍攝選單就可以調校，其中的自動包圍功能更提供感光度及白平衡設定，於室內拍攝時擔心光圈太細影到手震的話，相機就會同時影多兩張唔同感光度的相片，總會有一張啱你心水。

變焦記憶啱玩Snap

有用開單反的朋友都知道，鏡頭的焦距對於拍攝十分重要，可惜大部分DC都沒有顯示拍攝時的焦距，大家只能推測大概的範圍，因此P7000就特別在拍攝選單內增設變焦記憶功能，喜歡使用某個特定焦段拍攝的朋友，可以預先在用戶設定模式內將焦距記錄下來，例如接近人眼視點的50mm、拍攝人像最適合的85mm等，只要按着Fn鍵用變焦桿一拉，就能跳到預設的焦段，喜歡Snapshot的朋友肯定會大讚方便，配合最多3組用戶設定模式，要即時「換鏡頭」都冇難度。

虛擬水平線用途多

作為Nikon旗艦機，P7000當然亦內置了不少專業的個人化設定，例如用家可根據使用習慣，將位於鏡頭附近的Fn鍵設定成為RAW檔切換鍵、測光模式等，而機頂的Av/Tv鍵更是虛擬水平線快捷鍵，開啟後，屏幕中間會出現一個圓形的360°虛擬水平儀，當相機呈水平時，箭嘴便會變成綠色作出提示，所以就算站在斜路影橫直度相片，都唔怕相片影到東歪西倒；另外，水平線以外還有刻度顯示，想專登打斜影都可以作出量度，隨時發揮你的創意。