山口式熊貓開P應節

海洋堂嘅「山口式」Revoltech系列，呢幾年搵嚟一班新派卡通人物做生招牌，而且每逢過時過節就出特別版，搞到大家唔買唔安樂，除咗夏祭版及聖誕版嘅Toro貓，今個萬聖節仲有「鬼仔版」暴力熊，加埋南瓜裝嘅Toro貓，就算唔出街，都夠晒朋友仔陪你喺屋企開P！

暴力熊鬼上身　Pity瘦剩棚骨

大家咪畀暴力熊Gloomy個可愛樣呃到！佢原本係一隻被遺棄喺路邊嘅粉紅色Bear Bear，畀小朋友Pity發現，好心帶佢返屋企收養，弊在呢隻熊大大吓就回復獸性，成日出口又出爪，咬到Pity個頭血淋淋，不過每次Pity都奇迹好得番，故事夠離奇未？呢對虐待與被虐組合，最近出咗萬聖節版本，着住紅卜卜魔鬼裝嘅暴力熊繼續成口血，揮舞佢對血爪，插爆南瓜頭；Pity就着起骷髏衣，佢個「九．一」分界頭，同樣有流晒血嘅傷痕。嫌未夠熱鬧，大可掃埋早前推出嘅萬聖節版Toro及Kuro貓，兩隻衰嘢都着咗南瓜衫，你話南瓜頭得意，定係個貓樣搞笑啲？

同場加映：周五鬼王

自問唔怕嚇、愈驚愈過癮嘅玩具迷，就唔好錯過「特攝Revoltech系列」嘅《黑色星期五》「鬼王」Jason喇！呢隻Jason玩法多多，隨盒包一個斷頭台情景底座，仲有超多武器換，好似染血開山刀、斧頭、手鋸，甚至農夫用嘅犁耙都有，曲棍球面罩又拆得，面相仲有完整版及「爆缸版」畀你換，恐怖電影發燒友必Buy！

查詢：（a）2388 4677、（b）2866 3888、（c）9425 4335