萬聖節離不開南瓜，究竟南瓜有乜營養？打電話畀我個Friend、營匯專業營養顧問中心註冊營養師郭爾殷（Yvonne）問吓先，佢話：「南瓜屬於低熱量、高纖維嘅食物，一杯（250毫升）南瓜蓉約等於49卡路里，亦含有2.7克纖維量，所以能增加飽肚感。南瓜含有豐富嘅維他命A，對視力健康好有幫助，三分一杯南瓜蓉已經符合成年人一日所需分量。由於維他命A屬脂溶性維他命，如果想令身體更易吸收，最好用少少油嚟煮。」
Yvonne仲提醒我：「由於南瓜可以整成南瓜蓉，尤其啱細路同長者，唔怕骾親，不過孕婦同糖尿病患者就要適可而止，皆因孕婦唔可以攝取過量維他命A，否則可能影響胎兒發育。由於南瓜屬碳水化合物，所以糖尿病患者要好好控制糖分嘅攝取量。」
可治療哮喘
另一個Friend家健中醫針灸骨科醫療中心嘅黃梅芳註冊中醫師，就教我用南瓜煲湯，黃醫師話：「响中醫角度，南瓜有唔錯嘅食性和功用。南瓜性味甘、平，果實含瓜氨酸、精氨酸、天冬酰氨、腺嘌呤、維他命B、維他命C、葡萄糖、蔗糖、甘露醇等成分，具有健脾開胃，益氣生津，解毒消腫嘅功效。」咁對我哋嚟講，南瓜有乜實際用途呢？黃醫師補充：「查實南瓜嘅應用相當廣泛，有需要時可先諮詢註冊中醫師嘅專業意見，然後用南瓜調理身體，好似用嚟治療哮喘。方法好簡單，先將南瓜去皮，加入大麥糖二斤蒸半小時後，每日取二匙羹，滾水沖服。又或者用老南瓜曬乾磨成粉抹，混入黃醋後，可外敷患部，有消腫效果；不過要注意，如果胃中食積者（如消化不良者）勿食，亦唔好同豬肝一齊食。」
南瓜百合杞子湯
材 料：
南瓜250克、百合20克、杞子10克。
做 法：
將食材加水，一起煮1小時即成；此湯同時可製成糖水飲用。
適合人士：
腎虛如失眠、浮腫人士，經常飲用有補腎安神及消腫之效，每周2至3次。
南瓜雪耳杏仁豬(月展)湯
材 料：
南瓜250克、雪耳15克、杏仁10克、豬(月展)少許。
做 法：
把上述食材加水，一起煮1小時即可食用，連湯渣同服。
適合人士：
潤肺化痰，適合肺燥痰多、吸煙或夜睡人士，每周2至3次。
南瓜蓮子淮山湯
材 料：
南瓜250克、蓮子10克、淮山20克、瘦肉少許。
做 法：
將上述食材加水一起煮1小時即可食用，連湯渣同服。
適合人士：
脾虛人士，如胃腹脹氣人士或糖尿病人士，每周2至3次。
中醫史書大起底！
返到屋企，我都立時上網搵吓資料。由古代開始，因為南瓜有上佳嘅保健功效，所以備受關注。中醫史書《滇南本草》中記載：「南瓜性溫、味甘，入脾、胃二經，能潤肺益氣、化痰排膿、驅蟲解毒，治咳嗽、哮喘、便秘等病症。」仲有資料話南瓜有清心醒腦嘅功效，可治療頭暈、心煩、口渴等陰虛火旺病症，因此，神經衰弱、記憶力減退人士，不妨每日其中一餐嘅一味餸係南瓜。嘩，南瓜咁有益，唔使一定萬聖節，平日都要食多啲囉！
雕南瓜嚇鬼？
究竟萬聖節同南瓜有咩關係呢？原來南瓜燈原名叫傑克燈（Jack-O-Lantern），相傳係一個叫阿Jack嘅人，因為佢呃咗撒旦，死後上唔到天堂、又落唔到地獄，於是撒旦就送咗一個有蠟燭嘅大頭菜為佢引路。傳統上，英國同愛爾蘭人會响萬聖節嗰晚，放大頭菜燈响屋外，表示對邪惡靈體嘅同情及關注。故事後嚟流傳到美國，大家就改用比較容易雕刻嘅南瓜代替，並且响南瓜上雕上嚇人面容，目的係嚇走妖魔鬼怪！
今次應吓節，南瓜開餐。
南瓜屬碳水化合物，糖尿病患者、減肥人士要適可而止，以免攝取過多糖分。
南瓜百合杞子湯
材 料：南瓜250克、百合20克、杞子10克。做 法：將食材加水，一起煮1小時即成；此湯同時可製成糖水飲用。適合人士：腎虛如失眠、浮腫人士，經常飲用有補腎安神及消腫之效，每周2至3次。
南瓜雪耳杏仁豬(月展)湯
材 料：南瓜250克、雪耳15克、杏仁10克、豬(月展)少許。做 法：把上述食材加水，一起煮1小時即可食用，連湯渣同服。適合人士：潤肺化痰，適合肺燥痰多、吸煙或夜睡人士，每周2至3次。
南瓜蓮子淮山湯
材 料：南瓜250克、蓮子10克、淮山20克、瘦肉少許。做 法：將上述食材加水一起煮1小時即可食用，連湯渣同服。適合人士：脾虛人士，如胃腹脹氣人士或糖尿病人士，每周2至3次。