梁嘉琪萬聖節 Yashica NV-1紅外線影鬼

萬聖節就到，講單真人真事畀大家聽。話說某日，梁嘉琪約埋成班Friends去旺角行街街，興之所至影張合照留念，殊不知出嚟後大家都嚇咗一跳，皆因個個都雙眼發青光，猶如鬼上身一樣。嘉琪即刻打畀拍檔司徒法正問個究竟，師傅問完一輪後就話，純粹因為當日用嘅Yashica NV-1相機有紅外線夜攝功能，影出嚟就梗係似鬼樣啦。師傅仲話︰「哈囉喂拎出嚟玩，好有氣氛！」

年輕拍友未必聽過Yashica呢個品牌，但若從菲林機玩起的話，就會知佢其實係菲林機王Contax嘅姊妹品牌。Yashica近幾年產量較少，被人遺忘唔出奇，但自從早排出咗部數碼LOMO機F521後，大家開始重新注意呢間DC廠，而今次呢部NV-1亦繼續玩嘢，玩咩？IR夜攝是也！

大白天照影

未講相機前，先要了解咩叫做紅外線攝影。呢種拍攝技巧，以往多應用在軍用夜視鏡上，但隨着技術成熟，近年唔少民用機都借此增加賣點，之前SONY部偷拍「夜視王」就是一例。原理上，它分為主動及被動式兩種，前者會捕捉目標自身發出的紅外線，但由於日間溫度高，大白天好難用得到；後者則把紅外線打在目標身上，再透過特殊感光元件感應，由於只接收特定波長，因此唔受日光影響，日光日白都照影可也。

影人發青光

NV-1玩到Night Vision，正正是採用了被動式紅外線拍攝技術。佢個鏡頭旁邊設有6盞紅外線射燈，只要開啟夜攝模式，射燈就會亮起，並同步翻起鏡頭前的IR濾鏡，咁就拍攝到紅外線景物。實測所見，白天使用時，出嚟嘅照片跟黑白相無異，但全黑下卻能睇得一清二楚，而且由於燈光會反射到視網膜，因此影人會個個雙眼發晒青光，認真嚇鬼！

一秒改肥瘦

但比起污糟嘢，相信女士們更擔心會唔會好似國寶一樣慘被偷怕。放心，呢部NV-1穿透力冇咁強，鹹濕仔唔會影到透衫飛釘相，女士可以放心玩。而最叫女生驚喜嘅係，佢內置咗變形功能，影完相按個掣就可把相中人搓圓按扁，保證一秒即能變肥變瘦。其他規格方面，1,200萬像素鏡頭、5倍數碼變焦、人臉對焦及一笑即拍樣樣齊，最正係拍Motion JPEG影片都一樣用到夜攝模式，去哈囉喂時可以拍番套恐怖片擺上網，朋友睇完仲唔o依嘩鬼叫！

機檔案

影相像素：1,200萬像素 （插值）

拍片像素：720×480（VGA）

數碼變焦：5倍

顯示屏：2.7吋TFT

體　　積：94×61×18.2mm

重　　量：80g

查　　詢：3102 2783

Ka Ki Wants to Share 怕鬼唔出外景

「最近我嘅主要工作，都係同司徒法正合作主持電視節目《詭異檔案》，每集都會有師傅嘅外景拍攝同嘉賓訪問。不過今次我就唔似以前《怪談》般要出外景，雖然監製都想我出，但我堅持唔去，講真我都幾怕鬼，屋企人又擔心。依家坐喺度就聽到鬼古，我個心舒服好多！」

I Enjoy 拍古裝劇開心充實

「除咗做主持，最近我都忙於為《女拳》及《洪武三十二》兩套劇開工，後者係我第一部古裝打戲，不過最難忘都係一場自刎戲，講我要攬住條假死屍瞓喺度，馬德鐘仲係咁笑我第時會有陰影，真係畀佢激死！不過拍劇令我獲益良好，好開心同充實！」

I Like 收史力奇錢箱好感動

「我一直好鍾意史力奇，因為佢唔似一般公仔咁成日笑笑口，好Cool同好型，若將來我男朋友好似佢咁就正啦！早排有個Fans送咗個史力奇錢箱畀我，表面黐滿晒同色嘅Swarovski水晶，感動死我！」

I Travel 首爾食元祖雞鍋

「平日工作壓力大，所以一有時間我就會去旅行，好似前排就去咗首爾，唔單止喪買化妝品，仲日日食我至鍾意嘅辣嘢，推薦大家一定要食元祖雞鍋，啲雞又辣又滑，諗起都流晒口水！」