魔盜大戰爭奪深海幽靈
小魔女、海盜王平日無仇無怨，點解會大打出手？原來係為咗一碟意粉！小記查探得知，這碟並非普通貨色，而是為Halloween炮製的「深海幽靈」，條條墨汁意粉就像從船身四方八面湧出，夠晒詭異，連同多款海鮮，散發陣陣香氣，咁好食，難怪會無情講啦！
來到Halloween，小朋友就話通街喊Trick or Treat，大朋友唔通無得玩？好彩，呢個節日愈來愈受歡迎，餐廳、酒店甚至商場都準備好節目，美食、飲品大玩驚嚇包裝，更可入住酒店主題套房癲番晚。
3道菜驚嚇全餐
以為哈囉喂的「應節食物」好睇唔好食？除了斷指、老鼠、毛毛蟲以外，位於尖沙咀的Duke's Deli就由10月28日至31日推出3道菜晚市套餐，美味又飽肚。輪流上枱的3道菜晚餐，經大廚精心炮製，以想像力，結合顏色豐富的食材如南瓜、墨汁及番茄等，做成立體棺材、鬼眼等，雖有點恐怖，但絕不令人反胃，大可盡情勁擦一餐。
價錢方面，晚餐按主菜選擇收費，由$168起，食到飽飽每位唔使二百蚊。而這走美式路線的餐廳，為配合佳節，特別裝扮成恐怖食堂，到處有南瓜頭、蜘蛛網、墓碑、骷髏頭等，未開餐冇飯氣到，咪話唔「心寒」。
查詢：3583 4696
名劇做主題套房
走型格路線的精品酒店帝樂文娜公館，今年亦大玩哈囉喂！酒吧Dada Bar+Lounge供應特製萬聖節雞尾酒系列，可配襯在年底開業、由北歐餐廳FINDS在酒吧供應的Scary Scapas風味小食系列，一於約埋班Friend傾偈暢飲。《The Rocky Horror Show》為萬聖節經典電影，酒店特別以此劇為題，炮製Week of Horror，例如在主題廂房地獄（Hell），品嘗由名廚精心設計的Welcome To Hell晚宴。晚飯直落好節目：入住The Rocky Horror Show主題套房，房間布置都跟電影配合，像是變身當中一角。
註：酒店推廣各有不同限期，請自行查詢。
查詢：3763 8778
商場鬼屋餐廳
免費鬼屋吸引力大，難怪旺角新世紀廣場的《娃鬼餐廳》主題鬼屋經常人山人海，這活動今年已是第５年舉行，為搞搞新意思，由即日至10月31日增設餐飲部，跟帝京酒店及樓上Cafe合作推出多款「新奇屍房菜」及萬聖節主題分子料理，像冬甩、南瓜芝士蛋糕等，造型可愛，堂食及外賣均可。
開放時間：星期一至五
4:00pm-8:00pm
星期六、日
2:00pm-8:00pm
查 詢：2397 0790
撈亂骨頭（燒烤醬燒排骨拼豬寸骨配棺材包）
豬肋骨及豬寸骨燒得香口，放埋一齊似足撈亂骨頭，淋上調製的燒烤汁，啖啖惹味。
走美式路線的Duke's Deli，氣氛輕鬆舒服，還會趁節日前布置一番。
深海幽靈（香草醬忌廉汁燴海鮮墨魚汁意粉）
深海內有甚麼幽靈？就係蜆、八爪魚及魷魚及大虎蝦等，墨汁意粉入口al Dente，香濃無比。
死唔眼閉（草莓醬配荔枝肉雜菜沙律）
荔枝肉釀入藍莓當鬼眼，再加士多啤梨混合桑莓而成的「血漿」，粒粒米仔粉變身「屍蟲」，感覺特別逼真。
惡靈南瓜（南瓜芝士凍餅）
軟身幼滑，還有香濃南瓜粒，為傳統的甜點增添新口味！
The Rocky Horror Show主題套房，布置跟劇情配合，猶如置身劇中。
"Finger Food" in Blood$88
香腸特別「變身」成綑黑邊斷指，蘸點自家製番茄醬，食得過癮。
Ants, Spiders, Roaches in Potato Croquette$98
圓圓的薯仔波內有松露碎、大葱等，炸得香口惹味，還可蘸洋葱醬吃。
小鬼兵團$30/件
外形如電玩角色食鬼，勾起大家的兒時回憶，加上色彩繽紛，令人愛不釋手。糖霜外皮下，其實是南瓜芝士蛋糕。
第5年舉行免費主題鬼屋，商場特別新增餐飲部，由「地獄廚神」招呼大家飲飲食食！
黑白骷髏$13
充滿神秘感的飲品，原來是鮮忌廉可樂，面層滑一滑，過後是豐富氣泡，感覺新奇。
