SR×機戰 古鐵出火
繼鐵甲萬能俠1、2號之後，今個月又有熱血沸騰嘅Super Robot合金新作品面世，正係人氣電玩《超級機械人大戰︰原創世紀》﹙簡稱「機戰OG」﹚嘅主角機古鐵！其實古鐵都出過唔少模型及景品，好似2006年嘅「究極造型可動」版本，可動性誇啦啦；今次SR版無論喺活動能力及墜手程度都更勝一籌，仲有「出火」Effect組件，堪稱玩具界嘅「超究極」版本！
金屬Ball Joint 靈活襟玩
原著中，古鐵標榜「擁有絕對火力，能夠進行正面突破」嘅人形機動兵器，機體設計偏向重裝甲加實彈武器，擅長中近距離戰鬥；千祈唔好以為重裝甲就身手笨拙，SR版古鐵嘅關節令人喜出望外，腳掌嘅接地性相當高，尤其是足踝嘅拉出式Ball Joint，唔會畀小腿裝甲頂住，加上金屬成分高，企得特別穩，相當出色！睇真啲，唔止對腳，原來古鐵嘅四肢關節都用咗金屬Ball Joint，可動性高，又唔怕扭得多會鬆、甚至乎爆，夠襟玩。
特效組件 使出雙絕招
古鐵粉絲一定認得佢支「紅燒甲蟲角」，仲有十足左輪上彈嘅「轉輪貫釘」，畀呢兩招擊中嘅嘍囉，統統Game Over，SR版本就開發出火燄Effect組件，輕易重現呢兩招熱血必殺技。除咗格鬥技，SR版本同樣設計埋古鐵嘅射擊型武器，例如肩甲可以完全打開，擺出「方陣掃蕩飛彈」全彈發射嘅姿勢，左手嘅三連裝機關炮亦做得好仔細。美中不足係只有兩對手掌組件（拳頭及開掌各一對），轉輪貫釘嘅輪盤子彈又唔可以逐粒拆出，附件數目及精細度仲有改善空間。
查詢︰2433 1828（瑞華行）
突擊！轉輪貫釘上彈！Super Robot Alteisen（PTX-003-C）建議零售價：$390
肩關節可作前後小幅度嘅屈曲，肩甲仲可以向內翻，增加手臂嘅伸展度。
方陣掃蕩飛彈！揭開上下兩節式肩甲，就擺到飛彈全開嘅甫士。
為咗遷就大型肩甲，所以手肘只用單關節，屈曲度只得90°。
膝頭用咗雙關節，可以大幅度向後擺腿，小腿外甲仲係金屬製品。
SR版古鐵高約14cm，同之前推出嘅萬能俠1號及2號機差唔多。
電熱刃怒斬！套上火燄Effect組件，個款似足電玩中嘅出招場面。
右手嘅輪盤可以拉出，但係拆唔到彈頭，得個樣。
左手有三連裝機關炮，凸顯古鐵的重火力形象。