《Star Wars：The Force Unleashed 2》 全家揮光劍逃避追殺

香港地唔少屋企全家人都係《星戰》迷，好似60後嘅爸爸細個時成日追《星戰》電影，70後嘅媽媽以前又會買《星戰》積木畀阿仔玩、而80後嘅仔仔更儲咗成套Figure，唔使多講都知係《星戰》死硬派Fans，所以今次《Star Wars：The Force Unleashed II》遊戲一出，你話佢哋有乜可能唔會揮動光劍，大打出手先！

專出《星戰》遊戲嘅Lucas Art，自從08年9月推出《星戰》外傳《Star Wars：The Force Unleashed》後，事隔兩年再推出續集《The Force Unleashed II》，餓咗機咁耐嘅《星戰》迷，今次仲唔「原力爆發」！

失利用價值 落格殺令

今集故事時間繼續設定在《星戰3》與《星戰4》之間，發生於上集之後半年，亦即係電影第4集發生前1年。上集主角Starkiller於皇帝一戰後身亡，後來畀黑武士再次複製，更成為佢嘅忠誠門徒，仲命令新一代Starkiller狩獵最後的Jedi Knight，不過任務結束後，黑武士竟然話佢再冇利用價值，要落格殺令！跟住充滿困惑嘅主角,心中突然聽到舊愛Juno嘅聲音，決定要認清自己，擺脫黑武士嘅追襲，展開一段自我探索之旅。

多招斬怪 儲分買武器

今集主角會改用藍色雙光劍，比單劍可使出更多有型有款嘅連續技，而且用上唔同招式了結敵人時，更會得到積分，可以當錢買新招式同裝備，所以大家斬怪時記得出多幾招喇！為求做到逼真嘅戰鬥環境，遊戲更首次利用咗Euphoria同Havok Physics物理系統，前者用嚟模擬人體嘅自然反應，即係用光劍斬低白兵時，佢會識得轉身「典典吓」先死；後者係一個模擬物件撞擊後嘅技術，好似劈斷機械人隻左腳時，機械人便會向左面跪低，跟現實情況一樣，打得更爽！

念力控制 敵人鬼打鬼

今集嘅原力系統得到強化，除咗同上集一樣可以將場景中嘅敵人或物件舉起再拋出外，玩家亦會得到可以控制敵人思想嘅全新「Mind Trick」力量，搞到佢哋成班鬼打鬼，甚至叫佢跳橋自殺都一樣得，將敵人變成自己力量之一，玩法更多元化，各位要好好善用。另外，改良咗嘅原力等級系統，更能畀主角作唔同程度嘅強化，令原力發揮得更淋漓盡致，同時當主角面對難纏嘅敵人時，仲可以發動「原力憤怒」，令攻擊力同速度即時大幅提升。至於利用原力鎖定目標時嘅精準度都有所改良，解謎時就唔使試咁多次，抵讚！

遊戲檔案

類　　型：動作

開　　發：Lucas Art

平　　台：PS3、Xbox360

推出日期：10月26日

售　　價：$399

查詢：2418 8896