福榮街 買齊架生變靚鬼

福榮街 買齊架生變靚鬼

「Ha Ha Halloween……」無錯!下星期日就係萬聖節大日子,大家諗好點樣慶祝未呢?無論係出席派對,抑或喺屋企開Party,都唔少得扮鬼扮馬,要搵齊應節嘅服飾同道具,梗係去深水埗玩具精品批發及零售集中地福榮街啦!Let's Go!

第1站 嚇人鬼妝物

正所謂人靠衣裝,佛靠金裝,靚人一定要化妝,除咗靚女之外,於萬聖節當日出街,亦一樣要化個啱Feel嘅鬼妝嚟應節。於「恒樂」玩具店內,就有齊各式各樣嘅化鬼妝用品任你揀,想扮巫婆又得,西洋吸血殭屍亦得,真係扮乜鬼都話咁易!另外,店內仲有好多產品畀大家雙手化妝用,如夜光指甲,甚至經典恐怖片《猛鬼街》費迪嘅利刃鬼手套都有,只售25蚊,好抵玩!

第2站 兇悍武器庫

嗰晚要扮妖魔鬼怪,雙手得兩梳蕉咁又點夠嚇人呢?梗係要揸把兇悍武器啦!走過斜對面就有一間堪稱妖魔鬼怪「武器庫」嘅店舖,店內嘅武器應有盡有,例如勾魂使者嘅鐮刀、牛頭怪最鍾意嘅長柄斧頭、鬼卒專用鎖鏈,當然唔少得魔鬼嗰支三叉戟啦!除咗武器之外,店內嘅萬聖節服飾、面具、布置都有齊晒!老闆陳先生表示,店舖經營批發及零售玩具多年,貨品繁多,每逢節日都會準備好琳琅滿目嘅應節物品等客人選購,唔少大型機構、餐廳及酒吧,都會嚟幫襯。

第3站 嘩鬼齊開餐

萬聖節當晚,唔想出街同人逼,只係想同班朋友一齊開個嘩鬼派對,一樣可以玩得熱鬧又有氣氛。當然,首要條件就梗係要為派對場地精心布置一番,營造出有如落入陰間嘅詭異感覺啦!去到近港鐵站一間玩具精品店,可以搵到唔少嚟自美國及日本嘅萬聖節飾物,除咗南瓜版史迪仔以及怪誕城阿Jack嘅精品之外,亦有萬聖節專用餅模,方便大家整出惡形惡相嘅南瓜頭點心,畀班嘩鬼朋友食個夠本!

查詢:(a)2776 8898 (b)2361 4278(c)2361 4778

Max

使唔使用條咁粗嘅鎖鏈塔我呀?超粗鎖鏈$70(b)妖女,受死啦!幽冥鬼斧$15(b)

變身前平凡少女出發喇!

變身後鬼火咁靚

嘩!吸血殭屍……棚牙呀!只係賣4蚊,好抵玩!$4(a)

《猛鬼街》費迪利刃鬼手套,夠晒搶眼!$25(a)

只要按掣,呢隻鍘頭鬼就會舉起個頭,好鬼過癮!$460(b)

魔鬼三叉戟和南瓜糖果籃,絕對係萬聖節必備道具。魔鬼三叉戟$10南瓜糖果籃$20(b)

曲奇迷必備
好多女仔都鍾意自製曲奇,用呢套萬聖節曲奇餅模製作應節曲奇一定更添氣氛!$25(c)

萬聖節又點少得南瓜?用呢個南瓜蛋糕模整Cupcake就最應節喇!$114(c)

屋企有埋萬聖節特別版史迪仔座枱閃燈,萬聖節氣氛出晒嚟!$76(c)

出席萬聖節派對你想化個乜鬼妝呢?
(左)巫婆套裝$20(a)(右)綜合鬼怪套裝 $25(a)