正滑蓋對焦超快Fujifilm Z800EXR

on.cc 東方互動主頁

唔少女生鍾意用滑蓋式手機，貪其一推即開，夠晒方便好用；最近富士也推出了一部滑蓋式機仔Z800EXR，紅色鋼琴面殼，設計討好，而且對焦反應極快，加上內置Facebook及YouTube簡易上載功能，接駁到電腦後便可即時將靚相與好友分享，啱晒愛靚又喜歡Snapshot自拍的女生。

跟手機一樣，新推出的相機都玩觸控大芒，X800EXR機背就設有一個3.5吋46萬像素輕觸式屏幕，敏感度相當高，以指尖輕輕一篤就能進行拍攝設定，又可以根據喜好作分類及為拍攝的相片評分，重溫時就唔使再大海撈針。

0.158秒對焦影相快而準

Z800EXR不但屏幕反應快，就連對焦都同樣驚人，內置的感光元件加入大量單反使用的相位偵測對焦技術，配合原有的DC對焦技術，最快0.158秒已能成功對焦，唔怕錯失任何精彩時刻。另外，因應室內拍攝時容易出現手震的問題，此機配備了新式陀螺儀感應器防震系統，即使以ISO 400及1/20秒快門於室內進行拍攝，仍然可以清晰地影到女生的樣貌，若然用埋360°全景拍攝功能，更可以完全記錄低四周的美麗環境，旅行時影風景就大派用場。

介面一開二方便搵相

影完相後，女生們最喜歡坐低一齊重溫靚相，這個時候就可以利用播相介面內的星級評分，為相片加入最多五星、最少一星的評分，仲可以用「我的最愛」模式播放，將預先挑選了的靚相與朋友分享。另外，Z800EXR的播相介面還可以分為上下兩部分，同時顯示相片及相集的縮圖，搵相時就不用逐張慢慢Load，或用變焦桿放大縮細咁麻煩，甚至可按照日期、場景、人臉來尋找相片，搵相就更加方便直接。

EXR模式唔怕背光

影靚相除了需要技巧外，相機本身的機能都很重要，例如調校到主打的寬闊影像動態範圍（EXR）模式，相機就會因應環境作出調節，即使是身處餐廳向着背光的窗口進行自拍，影到窗外風光之餘，又唔會影到個人黑口黑面，效果不俗。同時相機的臉部偵測靈敏度頗高，不足1秒就能正確偵測到相中人臉，更可預先記錄低最多8個朋友的臉孔，方便相機辨認後自動進行優化，無論自拍或影大合照都啱用。