洗櫳大行動　清新接載靚女

想做柴可夫，唔一定要出貴車，但係車廂必定要整齊乾淨，皆因女仔人家見到你部車污糟邋遢，肯定即時皺晒眉！唔想畀人扣晒印象分，梗係要拿拿聲清潔車廂，正所謂架車靚即係車主都靚！

洗車廂唔一定要次次搵車房代勞，只要做足準備，都可以輕輕鬆鬆DIY搞掂，而且慳錢得多。開工前，除咗搵齊水桶、抹布、小型吸塵機等用具，仲要買定車廂專用嘅清潔劑，購買時向店員問清楚產品特性及用法，準備就緒，洗櫳Let's Go！

抹皮椅　起迹咪用蠻力

唔少車款都用多層式真皮座椅，想皮椅歷久常新，就要勤清理，落地冇耐嘅新車都唔懶得，事關空氣中嘅灰塵會被皮內嘅天然油脂吸收，令皮質變得乾燥，皮面就會暗啞無光。唔太污糟嘅話，用濕布抹抹就掂，千祈咪用高濃度化學清潔劑，亦唔好出盡力擦，會傷害皮質o架！對付陳年舊迹，就要用皮椅專用清潔劑，起迹之餘又可以軟化皮質，仲會形成保護層，令皮面回復光澤。此外，經常被陽光照射，亦加速真皮老化及龜裂，平日露天泊車最好用防曬擋遮蔭。

洗地氈　風乾先好放

出車有番一段日子，地氈唔邋遢就假，雖然深色地氈唔起眼，但係咪自欺欺人，啲污迹原封不動，好易令車廂成為病菌溫床。其實清潔地氈唔複雜，只需將整張地氈拎出車外，再以拍打方式去除沙泥，若然停泊位有電掣，用埋吸塵機就更好。吸完塵，就要徹底清洗一次，可以用一般清潔劑及毛刷，或者汽車地氈專用嘅清潔劑都得，洗完就等張地氈乾透晒，先好放番入車廂，否則好易孳生霉菌。搞完地氈，順手抹埋軚環、波桿、手掣、錶板、門柄及尾箱，一次過搞掂。

起膠紙迹　白電油咪過量

好多車主都鍾意喺車頭放公仔或香薰，仲要用雙面膠紙黐得實一實，拎走時就有難以清除嘅膠紙迹。唔想有礙觀瞻，不妨試用白電油抹抹，有效之餘又快乾，不過分量唔好過多，否則有機會令車廂嘅膠面或皮面甩色，而且係易燃物品，用嗰陣一定要小心！

抹皮示範

1.先將適量清潔劑噴喺皮面

2.再用乾布輕輕抹拭

3.中間位置明顯回復光亮。

產品推介

Rinrei皮革清潔保護劑 $65/支

清新味 花香味

特別配方令車櫳嘅皮製品保持光亮，質地亦維持柔軟狀態，用後仲有陣陣清新香氣，人都醒神啲。

Eagle One皮革清潔液 $58

適用於車內所有皮革部分，具有起迹及防護功效。

Eagle One皮椅清潔劑 $75

皮椅容易沾油脂、汗水及灰塵，呢款產品都可一一清除，令皮面回復光澤。

寶馬專用皮革清潔噴劑 $260

專為寶馬車系而設，有助去除皮面上嘅污迹，仲會形成一層保護膜，保持光潔如新。

Rinrei防塵防UV保護噴劑$65

備有防塵、防UV功能，唔只適用於錶板、門壁等皮革部分，連清潔輪胎、燈殼都啱用。

AUG清潔紙巾 $32

清潔錶板及保軚環嘅好幫手，只需輕輕一抹，就變得乾乾淨淨。

Carmate去污清潔劑 $60

適用於錶板、門壁、內飾等多個位置，除污之餘，仲有防UV及除菌功能，連輪胎都啱用。

查詢：2392 4244