《Vanquish》飛剷掃射擦到出火

射擊遊戲向來都係歐美廠商嘅強項，但換轉由日本公司開發，大家又覺得點？藉舊年開發出動作遊戲《Bayonetta》而上位嘅Platinum Games，今年就向高難度挑戰，整咗隻日式射擊遊戲《Vanquish》，最大特色係可以開動噴射裝置高速移動，遠距離就開槍掟手榴彈，埋身時則出拳起腳，將射擊及動作遊戲來個Crossover！

將《Vanquish》跟《Halo》、《Gears of War》等射擊遊戲系列比較，確實唔係太公平，而且Platinum Games可能都自知要走西方射擊遊戲條路並唔容易，所以就開發出強調速度感同華麗動作嘅另類射擊遊戲《Vanquish》，將《Bayonetta》嘅強項轉移到射擊遊戲上。

反恐搶奪太空站

故事講述美國一個太空站畀俄羅斯恐怖分子佔領，仲用太空武器炸毀三藩市，要脅美國無條件投降。美國就派出隸屬國防部嘅精銳部隊擺平呢單恐怖襲擊，玩家要控制特務Sam殺入太空站，運用各種特殊武器剷除大量機械人，進而阻止恐怖分子嘅陰謀。

開Turbo加速偷襲

主角特務Sam身穿嘅並唔係重型裝甲，而係剪裁貼身兼用上納米技術製作嘅輕型戰鬥服ARS，外觀上雖然冇咁霸氣，但動作方面就敏捷得多，而且仲可以發動隱藏在裝甲背後嘅噴射推動裝置，方便突然加速搵掩護或高速衝向敵人背後偷襲。更特別嘅係呢套ARS裝甲戰鬥服仲可以發動名為Augmented Reaction Mode強化反應模式，只要滿足到特定條件，即可令周邊事物速度變慢，咁就可以慢慢睇定敵人嘅弱點先至出手攻擊。

埋身戰拳打腳踢

今次出場嘅武器都跟同類遊戲大同小異，比較特別係可以在部分版圖上走上炮台掃射，又或者使用雷射炮居高臨下作大範圍攻擊。雖然有部分射擊遊戲都可以玩埋身肉搏，但《Vanquish》就滲入更多動作元素，近距離戰鬥時，可以出拳起腳攻擊對手，而且仲學埋《Bayonetta》嘅華麗攻擊技特點，可以在加速剷向敵人開火時，磨到地面擦出火光，型到不得了。《Vanquish》在畫面、動作以至速度感方面都有幾出色嘅表現，不過只得單打模式，無得組隊上網始終爭啲。

遊戲檔案

類　型：射擊

開　發：Platinum Games / Sega

平　台：PS3、Xbox 360

推出日期：10月21日

售　價：$338

查　詢：2620 6667