跑馬地十月啤酒節 今晚繼續上演

適逢德國啤酒節舉行200周年，「十月啤酒節」亦載譽歸來，並且已連續兩個禮拜三喺跑馬地馬場舉行，場面熱鬧到不得了。呢項一年一度嘅盛事今晚繼續上演，嚟過嘅朋友歡迎再次來臨跑馬地狂歡，未嚟過嘅話就更加唔可以錯過，一於約埋班Friends嚟喪飲喪玩，盡情癲番晚！

喺跑馬地馬場舉行嘅「十月啤酒節」，係馬季開鑼之後跑馬地馬場嘅最大型主題活動，成個馬場都會添上傳統巴伐利亞嘅藍、白格布置，着住傳統民族服裝嘅舞蹈員亦會大跳巴伐利亞民族舞，令整個跑馬地馬場洋溢住濃厚嘅德國慶典色彩，務求為大家送上氣氛最好同最正宗嘅啤酒節。

正宗德國風味

大會喺今個月6同13號已經舉行過兩次「十月啤酒節」活動，盛況空前嘅場面令大家樂而忘返。市民除咗可以品嘗正宗德國啤酒以及富有慕尼黑風味嘅地道美食之外，亦都有多個刺激有獎遊戲畀大家玩。唔少上次去過嘅朋友都大讚過癮，唔夠喉嘅你可以嚟多次繼續狂歡，至於未嚟過嘅朋友就更加要把握機會，約埋三五知己嚟玩番夠本，千祈咪錯過！

珍寶鹽脆包限量發售

參加得啤酒節，唔嗒番兩杯點得？喺今晚「啤酒園」將會繼續提供多個品牌嘅啤酒，梗有一款啱你口味。除此之外，「啤酒園」同馬場場畔專櫃更加會提供慕尼黑傳統啤酒節美食，好似鹹豬手、雜錦香腸、牛面頰、薑餅等等包羅萬有，最重要係由德裔主廚主理，風味肯定夠晒地道。之不過講到最有特色嘅，肯定係麵包師傅即場炮製嘅巨型珍寶鹽脆包（Pretzel），呢個包限量發售，手快有手慢冇。

競飲擂台贏3千現金券

除咗飲飲食食之外，大會更設有多個精彩有獎遊戲，包括「推啤酒樂激鬥」、「舉杯耐力戰」同「連環大對碰」，全面挑戰參賽者嘅力度、耐力同眼光。至於自問酒量一流嘅你，就肯定唔可以錯過「競飲擂台」，挑戰者要鬥快飲晒一杯一品脫裝嘅啤酒，最快嗰5位將會喺第5或第6場賽事之後進行現場直播嘅終極決戰，優勝者可以獨得3,000蚊現金券，包你玩到唔捨得走！

正宗德國地道美食

烤德國鹹豬手（配酸椰菜及餐包） $80

扒德國雜錦香腸（配酸椰菜及新薯） $48

扒德國紐倫堡香腸（配酸椰菜及新薯） $45

啤酒燴牛面頰 $50

茴香羊肉沙律墨西哥卷 $45

菠蘿烤雞串 $40

香辣串燒豬肉 $40

德國蘋果班戟配焦糖蘋果汁 $40

德國蘋果卷配雲呢拿汁 $20

德國芝士餅 $20

德國薯仔沙律 $20

鹽脆包 ─2件（Pretzel） $20