聽多40個鐘dexim Super-Juice充電殼

講電話、拍片、聽歌、加埋上網兼玩Apps，邊部機有咁多分唇﹖之唔係iPhone 4囉！但一部手機有咁多嘢玩，都好易玩到冇電。有冇計可以玩耐啲？有！dexim新出嘅Super-Juice充電殼，就可以令聽歌時間延長多40小時，差不多夠你聽足兩日咁滯！

電量比對手多4倍

iPhone充電殼唔係新玩意，基本上可延長10小時播歌時間已經好巴閉。今次dexim Super-Juice充電殼過人之處，在於內置嘅膠鋰電容量高達2,000mAh，接駁iPhone 4後就能延長40小時播歌時間，比對手襟用4倍！即使用於通話及打機，亦分別能用多6小時及10小時，夠晒長氣！特別留意機背還設有電量指示燈，紅燈亮起代表電量即將耗盡，提醒用戶係時候充電。

同步資料唔使拆殼

設計方面，Super-Juice採用純白作主色，同「黑仔4」可謂襯到絕，而最抵讚係外殼由堅硬物料製造，為本身已非常硬淨嘅iPhone 4多添一重保護。安裝問題亦考慮周到，除頂蓋可拆下方便將手機套入外，跟機更附送Micro USB線，毋須再拆電池殼便能讓手機跟電腦同步資料及充電。另外，為方便擺放，充電殼背面設有隱藏支架，伸出後就能讓手機座枱擺放，睇相播片自然更輕鬆自在。

查詢︰2395 3913